Europa është vënë në lëvizje pas kërcënimeve të presidentit amerikan Donald Trump, se do të vendosë tarifa të reja doganore ndaj vendeve të BE-së, nëse kundërshtojnë planet e tij për të blerë Groenlandën.
Siç shkruan BBC, Ministri i Mbrojtjes së Danimarkës, Troels Lund Poulsen, dhe Ministrja e Jashtme e Groenlandës, Vivian Motzfeldt, po takohen këtë të hënë në Bruksel me Sekretarin e Përgjithshëm të NATO-s, Mark Rutte. Sipas një deklarate nga Ministria e Mbrojtjes së Danimarkës, në rendin e ditës përfshihet “bashkëpunimi i NATO-s për sigurinë, mbrojtjen dhe parandalimin” në Arktik.
Ndërkohë në Francë, presidenti Emmanuel Macron po zhvillon sot një mbledhje urgjente të këshillit të mbrojtjes mbi Groenlandën, Sirinë dhe Iranin.
Reuters shkruan se sot, ministrat e financave të Gjermanisë dhe Francës thanë se fuqitë evropiane nuk do të shantazhohen dhe se do të ketë një përgjigje të qartë dhe të bashkuar ndaj kërcënimeve për rritjen e tarifave amerikane mbi Groenlandën.
Presidenti Donald Trump premtoi të shtunën se do të vendoste një valë tarifash të shtuara mbi importet nga aleatët evropianë derisa Shtetet e Bashkuara të lejohen të blejnë Groenlandën, duke intensifikuar një mosmarrëveshje mbi të ardhmen e ishullit të madh arktik të Danimarkës.
“Gjermania dhe Franca bien dakord: nuk do të lejojmë të shantazhohemi,” tha ministri gjerman i financave Lars Klingbeil në ministrinë e tij ku priti homologun francez.
“Shantazhi mes aleatëve prej 250 vitesh, shantazhi mes miqve, është qartësisht i papranueshëm,” tha ministri francez i Financave Roland Lescure në të njëjtin takim.
Instrumenti kundër shantazhit në tryezë
Ndërkohë udhëheqësit e BE-së pritet të diskutojnë opsionet në një samit emergjent në Bruksel të enjten. Një opsion është një paketë tarifash mbi 93 miliardë euro ndaj importeve amerikane që mund të hyjë automatikisht në fuqi më 6 shkurt pas një pezullimi gjashtëmujor.
“Ne evropianët duhet ta bëjmë të qartë: kufiri është arritur,” tha Klingbeil. “Dora jonë është e shtrirë, por nuk jemi të gatshëm të shantazhohemi.”
Opsioni tjetër është “Instrumenti kundër shantazhit”, i cili deri më tani nuk është përdorur kurrë, dhe mund të kufizojë aksesin në tenderë publikë, investime ose aktivitete bankare, ose të kufizojë tregtinë e shërbimeve, ku SHBA-të kanë suficit me bllokun, përfshirë shërbimet digjitale.
Lescure tha se megjithëse instrumenti i BE-së kundër shantazhit ishte mbi të gjitha një mjet parandalues, ai duhet të merret në konsideratë në rrethanat aktuale.
“Franca dëshiron ta shqyrtojmë këtë mundësi, duke shpresuar, sigurisht, që parandalimi të mbizotërojë,” tha Lescure. Ai shtoi se shpresonte që marrëdhënia transatlantike të kthehej të ishte “miqësore dhe e bazuar në negociata, dhe jo në kërcënime e shantazh”.
Klingbeil tha se nuk ishte i interesuar për përshkallëzim, pasi kjo do të vinte me kosto për ekonomitë në të dy anët e Atlantikut.
Europa nuk është e dobët
Homologu amerikan i Klingbeil dhe Lescure, Scott Bessent, tha të dielën se “dobësia” evropiane e bënte të domosdoshme kontrollin amerikan mbi Groenlandën për stabilitet global.
Lescure tha se Europa duhet të miratojë reforma për të rritur avantazhin teknologjik dhe produktivitetin, në mënyrë që të tregojë se është e fortë dhe jo e dobët.
“Objektivi ynë në ditët, javët, tremujorët dhe vitet e ardhshme është ta bindim me mirësjellje por me vendosmëri Scott Bessent se ai gabon,” tha Lescure.
