Ish-presidenti Ilir Meta ka ankimuar në Apelin e Gjykatës së Posaçme, vendimin e 5 janarit që e la atë në burg.
Seanca për ankimimin e Metës do të mbahet më 30 janar.
“Ju vëmë në dijeni se datë 30 Janar 2026, ora 10:30, në sallën e gjykimeve të Gjykatës së Posaçme të Apelit për Korrupsionin dhe Krimin e Organizuar. Tiranë, është caktuar për t’u zhvilluar gjykimi në shkallë të dytë, i kërkesës penale nr.36 regjistri themeltar, që i përket: KËRKUES: Prokuroria Posaçme kundër Korrupsionit dhe Krimit të Organizuar
I PANDEHUR/ANKUES: Ilir Metaj
OBJEKTI: Pezullim afatesh paraburgimi
BAZA LIGJORE: Neni 265 i K.Pr. Penale.
Kjo gjykatë është vënë në lëvizje mbi apelin e paraqitur nga kërkuesi Ilir Metaj, interesat e të cilit ju mbroni në këtë gjykim.
Kjo çështje me shortin e datës 26.01.2026 i ka kaluar gjyqtares Saida Dollani, e cila ka dhënë vendimin nr. 234 datë 23.10.2025.
Mosparaqitja juaj pa shkaqe te arsyeshme, do të shkaktojë zëvendësimin tuaj me mbrojtës kryesisht, të caktuar nga gjykata e apelit. Ky njoftim te realizohet nga ftuesi gjyqësor”, thuhet në njoftim.
Më 5 janar Gjykata e Posaçme rrëzoi kërkesën e ish-presidentit Ilir Meta për zëvendësimin e masës së sigurimit personal. Meta, i cili ndodhet aktualisht në arrest me burg, kishte kërkuar që kjo masë të zëvendësohej me një masë më të butë sigurimi, sipas parashikimeve të Kodit të Procedurës Penale.
Kërkesa e Metës për lirimin nga qelia është rrëzuar edhe më parë nga të tria shkallët e gjyqësorit.
Ilir Meta ndodhet në burg që prej 21 tetorit 2024. Dosja ‘Meta’ përfshin tre hetime të bashkuara: aferën CEZ-DIA, lobimin në SHBA dhe hetimin pasuror. Meta dhe Kryemadhi akuzohen për korrupsion pasiv, pastrim parash dhe mosdeklarim pasurie.
Gjykata Kushtetuese ka vendosur këtë të mërkurë, të mos pranojë kërkesën e ish-ministrit të Shëndetësisë, Ilir Beqaj, i cili kishte kërkuar shfuqizimin e vendimit të Gjykatës së Posaçme për Korrupsionin dhe Krimin e Organizuar që e kishte vendosur atë në masën e sigurisë “arrest me burg”.
Gazetarja e Klan News Glidona Daci raporton se në kërkesën e tij, Beqaj argumentonte se vendimi ishte në kundërshtim me Kushtetutën, duke kërkuar që çështja të rigjykohej në Gjykatën e Posaçme të Shkallës së Parë, si dhe të rrëzoheshin vendimet e dhëna nga Apeli dhe Gjykata e Lartë.
Megjithatë, Gjykata Kushtetuese vendosi të lërë në fuqi të gjitha vendimet e mëparshme, duke i rrëzuar pretendimet e paraqitura nga ish-ministri, në përputhje me procedurat ligjore në fuqi.
Sjellim ndërmend se ish-ministri Ilir Beqaj u vu nën hetim nga SPAK për veprën penale të korrupsionit pasiv, në cilësinë e ish-Drejtorit të Përgjithshëm të Agjencisë SASPAC, akuza të cilat i ka mohuar.
Ai u arrestua më 4 korrik 2024 dhe ndodhet prej më shumë se një viti i izoluar në paraburgimin e Durrësit. Krahas dosjes së SASPAC, ai po hetohet edhe për koncesionin e “Sterilizimit” në Shëndetësi.
