Qafa e Llogorasë është përfshirë sërish nga zjarret, pasi mbrëmjen e sotme janë evidentuar disa vatra aktive në këtë zonë me rëndësi të veçantë natyrore dhe turistike. Mesohet se situata është ndjekur nga afër nga strukturat përgjegjëse, ndërsa shqetësimi mbetet i lartë.
Ky është një tjetër episod në një seri ngjarjesh të ngjashme të regjistruara gjatë 10 ditëve të fundit. Autoritetet raportojnë se ndezja e vatrave në të njëjtën kohë dhe në orare të vona ngre dyshime të forta për ndërhyrje njerëzore, duke përjashtuar gjithnjë e më shumë shkaqet natyrore.
Falë ndërhyrjes së shpejtë të shërbimit zjarrfikës, flakët janë vënë nën kontroll përpara se të përhapeshin në sipërfaqe më të mëdha pyjore. Reagimi në kohë ka shmangur dëme të konsiderueshme në parkun natyror të Llogorasë.
Ndërkohë, Policia e Shtetit, në bashkëpunim me grupin hetimor, ka nisur veprimet për të dokumentuar rastin dhe për të identifikuar personat përgjegjës. Hetimet po vijojnë, ndërsa autoritetet apelojnë për vigjilencë dhe bashkëpunim nga qytetarët.
