Parlamenti Evropian ka miratuar sot një paketë vendimesh kyçe që prekin politikën e jashtme, tregtinë bujqësore dhe sovranitetin monetar të Bashkimit Evropian.
Me një shumicë të udhëhequr nga Partia Popullore Evropiane (PPE) dhe grupet e djathta, Strasburgu i ka dhënë dritën jeshile procedurave të përshpejtuara të azilit dhe marrëveshjes së debatuar tregtare me vendet e Amerikës Latine.
Kosova dhe 6 vende të tjera shpallen “të sigurta”
Në një lëvizje që synon të ulë presionin migrator, PE miratoi ndryshimet në rregulloren e azilit. Kosova, Bangladeshi, Kolumbia, Egjipti, India, Maroku dhe Tunizia tashmë do të konsiderohen zyrtarisht “vende të sigurta”.
Çfarë do të thotë kjo? Kërkesat për azil nga qytetarët e këtyre vendeve do të shqyrtohen me procedurë të përshpejtuar, duke lehtësuar riatdhesimin e shpejtë.
Rregullat e reja u japin mundësi shteteve anëtare të BE-së të lidhin marrëveshje me vende jashtë bllokut për shqyrtimin e aplikimeve të migrantëve atje.
