Komisioni parlamentar për Ekonominë, Punësimin dhe Financat ka rrëzuar në parim dy nisma ligjore të propozuara nga deputeti i opozitës, Bujar Leskaj, të cilat synonin një decentralizim më të madh fiskal dhe rritjen e të ardhurave për njësitë e qeverisjes vendore.
Në mbledhjen e drejtuar nga kryetarja e komisionit, Milva Ekonomi, ku i pranishëm ishte edhe zëvendësministri i Financave, Endrit Yzeiraj, shumica parlamentare argumentoi se projektligjet paraqisnin mangësi në analizën e efekteve buxhetore dhe mund të cenonin barazinë mes bashkive.
Debati për Rentën Minerare
Nisma e parë e shqyrtuar ishte projektligji “Për një ndryshim në ligjin nr. 68/2017 ‘Për Financat e Vetëqeverisjes Vendore’”. Qëllimi kryesor i këtij drafti ishte rritja e nivelit të rentës minerare që shkon në favor të bashkive, duke e trefishuar atë nga 5% në 15%.
Deputeti Elton Korreshi, në cilësinë e relatorit, kërkoi rrëzimin e nismës me disa argumente teknike dhe procedurale. Sipas tij, propozimi paraqiste këto problematika si mungesa e një analize makroekonomike. Sipas tij, nisma nuk shoqërohej me një analizë të plotë të ndikimit të saj shumëvjeçar në Buxhetin e Shtetit.
Nga ana tjetër u vlerësua si cenim i programeve prioritare, pasi transferimi i këtyre fondeve mund të ndikonte negativisht në financimin e projekteve të tjera qendrore.
Projektligji, u theksua, nuk ishte rakorduar paraprakisht me Ministrinë e Financave, si institucioni përgjegjës për politikat fiskale në vend.
Pas diskutimeve, komisioni votoi me shumicë votash kundër kalimit të këtij projektligji.
Decentralizimi dhe “Taksat Kombëtare”
Fatin e nismës së parë pati edhe drafti i dytë, “Për një ndryshim në ligjin nr. 9975, ‘Për taksat kombëtare’”. Ky projektligj synonte t’u jepte më shumë pavarësi fiskale bashkive, por u kundërshtua nga relatorja, deputetja Antoneta Dhima.
Ajo argumentoi se përveç mungesës së konsultimit publik dhe atij institucional me Ministrinë e Financave, drafti rrezikonte të thellonte pabarazinë financiare. Sipas saj, aplikimi i këtyre ndryshimeve do të favorizonte bashkitë e mëdha apo ato me potenciale të caktuara gjeografike e ekonomike, duke lënë pas dore bashkitë më të vogla dhe me pak të ardhura. Edhe ky draft u rrëzua në parim nga shumica e komisionit.
Në përfundim të mbledhjes, komisioni vendosi të shtyjë për një seancë të radhës shqyrtimin e një tjetër projektligji të rëndësishëm, atij “Për përgjegjësinë financiare të punonjësve publikë”.
