Disa vende të Gjirit raportuan gjatë natës sulme me dronë dhe raketa të lëshuara nga Irani, ndërsa sistemet e mbrojtjes ajrore në rajon u aktivizuan për të zmbrapsur kërcënimet.
Ministria e Mbrojtjes e Arabisë Saudite njoftoi se kishte rrëzuar 26 dronë iranianë mbi territorin e saj, kryesisht pranë kryeqytetit Riad dhe në rajonet lindore të vendit.
Emiratet e Bashkuara Arabe bënë të ditur se sistemet e saj të mbrojtjes ajrore po reagonin ndaj raketave dhe dronëve të ardhur nga Irani. Lajmi vjen pasi një zjarr i madh shpërtheu të shtunën në portin e Fujairah, ku ndodhet një terminal i rëndësishëm për eksportin e naftës në bregun lindor të vendit, pas një sulmi me dron.
Në të njëjtën kohë, autoritetet në Bahrain njoftuan se sirenat e alarmit ishin aktivizuar dhe u bënë thirrje banorëve të drejtohen drejt strehimoreve më të afërta.
Ndërkohë, gjatë natës, SHBA urdhëroi largimin nga Omani të punonjësve të qeverisë amerikane dhe familjarëve të tyre për shkak të shqetësimeve për sigurinë.
Edhe Kuvajti njoftoi të dielën se Garda e saj Kombëtare kishte rrëzuar pesë dronë iranianë gjatë 24 orëve të fundit.
Nga ana tjetër, Katari publikoi një përditësim vonë të shtunën duke bërë të ditur se kishte zmbrapsur disa sulme me raketa dhe dronë gjatë ditës, por deri tani nuk ka raportuar për goditje të reja gjatë natës.
