Lajme të këqija për kombëtaren shqiptare në prag të ndeshjes kundër Polonisë, e vlefshme për fazën e Play Off-it të Kupës së Botës 2026.
Sulmuesi Rey Manaj është larguar i dëmtuar nga fusha e lojën në sfidën Sivasspor-Umraniye në ligën e parë turke dhe sot klubi i tij ka njoftuar për shkallën e dëmtimin të lojtarit.
“Lojtari ynë Rey Manaj u dëmtua në muskulin e pasëm të kofshës së majtë në ndeshjen që luajtëm dje. Si rezultat i rezonancës magnetike (MR) të kryer sot, është konstatuar një çarje e tendinit brenda muskulit të shkallës 3c dhe gjakderdhje në muskulin e pasëm të kofshës së majtë”, shkruhet në njoftimin e Sivasporit.
Manaj detyrohet të qëndrojë larg fushës së blertë për 4-6 javë dhe për rrjedhojë humbet sfidën e 26 marsit kundër Polonisë.
Në këto kushte, trajneri Sylvinho duhet të bëjë llogaritë pa një prej sulmuesve më të rëndësishëm të kombëtares. Sa i takon situatës së lojtarëve të tjerë të ofensivës, Broja është rikuperuar te Burnley, ndërsa Daku është në garë me kohën.
