Kompania Meta ka njoftuar se mesazhet private të Instagram-it me enkriptim “end-to-end” do të hiqen zyrtarisht më 8 maj 2026.
Ky ndryshim teknik do të ndikojë në privatësinë e miliona përdoruesve, bisedat e të cilëve kanë qenë të paprekshme nga palët e treta, përfshirë vetë kompaninë ‘mëmë’ të platformës.
Meta këshillon përdoruesit që kanë biseda ekzistente të ndjekin udhëzimet në ekran për të shkarkuar mediat dhe arkivat para afatit, duke paralajmëruar se versionet e vjetra të aplikacionit nuk do të mbështesin më këtë funksion.
Pse po ndodh kjo dhe çfarë do të ndryshojë?
Meta nuk ka dhënë një listë të plotë të arsyeve të brendshme për këtë vendim, por konfirmon se pas 8 majit 2026, mbështetja për këtë enkriptim të veçantë do të zhduket nga ndërfaqja e Instagram-it.
Për përdoruesit, kjo do të thotë që bisedat nuk do të jenë më 100% private dhe platforma mund të ketë akses teknik mbi përmbajtjen e tyre, një ndryshim i rëndësishëm nga sistemi aktual që i mban mesazhet të paprekshme edhe për vetë Meta-n.
Po çfarë bën enkriptimi “end-to-end”
– Mesazhet kodohen që në momentin e dërgimit
Kur dërgon një mesazh, ai kodohet në telefonin tënd para se të dërgohet në serverin e Instagram-it. Vetëm telefoni i marrësit ka çelësin për ta “dekoduar” mesazhin dhe ta shohë në formë të qartë.
– As platforma nuk mund t’i lexojë
Edhe vetë Meta nuk ka akses në mesazhet e tua, sepse nuk ka çelësin për t’i deshifruar. Kjo do të thotë që mesazhet mbeten private nga çdo palë e tretë, përfshirë punonjësit e Meta-s.
– Mbështet siguri maksimale për informacion të ndjeshëm
Password-e, foto/video personale, biseda private, janë të mbrojtura nga hakerët dhe sulmet e jashtme. Nëse dikush e intercepton mesazhin në rrjet, ai është thjesht një pako e koduar dhe nuk mund të lexohet pa çelësin privat.
– Siguron që nuk ka ndërhyrje gjatë rrugës
Edhe nëse mesazhi kalon nga servera të shumtë ose rrjete publike, ai mbetet i koduar deri tek marrësi.
