Një demonstrim i teknologjisë së taksive ajrore elektrike është zhvilluar në zonën e San Franciskos, duke ofruar një vështrim praktik të mënyrës se si mund të evoluojë transporti urban në të ardhmen.
Kompania Joby Aviation realizoi një fluturim testues me një avion elektrik të tipit eVTOL, i cili u ngrit nga Oakland International Airport dhe fluturoi mbi San Francisco. Gjatë itinerarit, mjeti ajror kaloi pranë disa prej landmark-eve më të njohura të zonës, përfshirë Golden Gate Bridge.
Ky demonstrim është pjesë e përpjekjeve të kompanisë për të promovuar dhe testuar përdorimin e avionëve elektrikë për transport pasagjerësh në mjedise urbane. Sipas vizionit të saj, këto mjete mund të ofrojnë udhëtime më të shpejta dhe më efikase, duke reduktuar ndjeshëm kohën e përshkimit të distancave në qytete me trafik të rënduar.
Projekti mbështetet edhe nga Administrata Federale e Aviacionit në SHBA (Federal Aviation Administration), e cila ka përfshirë kompaninë në një program pilot për testimin dhe integrimin e avionëve me ngritje dhe ulje vertikale elektrike (eVTOL). Ky program synon të vlerësojë përdorimin e tyre jo vetëm për transport pasagjerësh, por edhe për shërbime të tjera si transport mallrash dhe misione emergjente.
Sipas planifikimeve, operacionet e para mund të nisin në disa shtete amerikane brenda muajve të ardhshëm, ndërsa ende nuk ka një datë të saktë për fillimin e shërbimit komercial në San Francisko. Kompania synon që çmimet të jenë të krahasueshme me shërbime premium transporti, ndërkohë që në të ardhmen po shqyrton edhe përdorimin e fluturimeve autonome pa pilot.
