Më shumë detaje janë mësuar lidhur me ngjarjen e rëndë që ndodhi mbrëmjen e së dielës në aeroportin LaGuardia në New York, ku një avion i Air Canada u përplas me një automjet zjarrfikës në pistë.
Viktimat janë identifikuar si Antoine Forest, 30 vjeç nga Québec, dhe Mackenzie Gunther, i diplomuar së fundmi në Toronto.
Incidenti, i cili ndodhi në orën 23:40 me kohën lokale të dielën, plagosi 41 persona që u dërguan në spital dhe mbylli aeroportin e New York-ut deri të hënën pasdite.
“Këta ishin dy të rinj në fillim të karrierës së tyre, ndaj është një tragjedi e madhe që po përballemi me humbjen e tyre,” tha administratori i Administratës Federale të Aviacionit (FAA), Bran Bedford.
Është hapur një hetim.
Një kontrollor i trafikut ajror u dëgjua duke thënë: “‘Kamioni Një, ndalo, ndalo, ndalo!” disa sekonda para përplasjes.
Hetimi do të përfshijë analizimin e regjistruesit të zërit në kabinën e avionit dhe regjistruesit të të dhënave të fluturimit.
Forest kishte mësuar të fluturonte avionë të vegjël në Saguenay në vitin 2018, përpara se të punësohej nga linja ajrore Air Canada në dhjetor të vitit 2022.
Halla e tij e madhe, Jeannette Gagnier, i tha gazetës se ai dhe vëllai i tij i kalonin verat me të ndërsa ai praktikonte anglishten për t’u bërë pilot.
“Është një ditë shumë e keqe për mua… ai gjithmonë bënte kurse dhe fluturonte. Nuk ndalonte kurrë… ai fluturoi avionin e tij të parë kur ishte 16 vjeç,” tha ajo.
Gunther iu bashkua Air Canada pas diplomimit nga Seneca, e cila njoftoi se flamujt në kampus do të uleshin në gjysmë shtize të martën.
“Seneca shpreh ngushëllimet më të thella për familjen dhe miqtë e zotit Gunther, si dhe për ish-kolegët dhe profesorët e tij. Do të mungojë shumë,” tha kolegji në një deklaratë.
Stjuardesa e Air Canada, Solange Tremblay nga Quebec, mbijetoi mrekullisht pasi u hodh jashtë avionit dhe u gjet e gjallë e lidhur në sediljen e saj më shumë se njëqind metra larg avionit, duke pësuar fraktura të shumta. Vajza e saj, Sarah Lépine, i tha transmetuesit lokal TVA Nouvelles të hënën se ajo ishte ulur pas pilotëve kur avioni u ul.
“Është një mrekulli,” tha Lépine. “Ajo kishte një engjëll mbrojtës mbi të. Mund të kishte qenë shumë më keq.”
Dy oficerët brenda kamionit zjarrfikës që u përplas me avionin gjithashtu u dërguan në spital me lëndime.
