Të paktën 24 persona kanë humbur jetën pasi një autobus që transportonte rreth 40 pasagjerë ra në lumin Padma gjatë përpjekjes për t’u ngjitur në një traget në Bangladesh.
Aksidenti ndodhi të mërkurën e datës 25 mars, kur autobusi humbi kontrollin duke u afruar te trageti në Daulatdia, në rrethin Rajbari, rreth 100 km nga Dhaka.
Autobusi u përmbys dhe u zhyt gati 9 metra në lumë, sipas policisë dhe Shërbimit të Zjarrfikësve dhe Mbrojtjes Civile.
Shpëtimtarët nxorën 22 trupa nga autobusi i zhytur nën ujë, mes të cilëve 6 burra, 11 gra dhe pesë fëmijë. Zyrtari i Shërbimit të Zjarrfikësve, Talha Bin Zasim tha se dy gra të tjera vdiqën pas shpëtimit, duke e çuar numrin e viktimave në 24.
Katër njësi zjarrfikëse dhe 10 zhytës po kryenin përpjekjet e kërkimit dhe shpëtimit, të mbështetura nga ushtria, policia, rojet bregdetare dhe autoritetet lokale.
Zyrtarët frikësohen se disa pasagjerë mund të jenë ende të zhdukur. Qindra persona vdesin çdo vit në aksidente rrugore dhe tragetesh në Bangladesh.
