Një shfaqje e pashembullt e forcës brutale dhe qëndrueshmërisë ekstreme fizike ka lënë pa fjalë vëzhguesit ndërkombëtarë, ndërsa udhëheqësi i Koresë së Veriut, Kim Jong-un, ka ndjekur nga afër “super-ushtarët” e tij në aksion.
Në pamjet e publikuara, ushtarët e elitës së Phenianit shfaqen duke kryer teste që sfidojnë kufijtë njerëzorë. Sipas raportimeve nga Daily Mail, skenat përfshinin:
Thyerjen e pllakave të betonit duke përdorur vetëm ballin dhe kokën.
Goditje me çekiçë të rëndë dhe lopata në pjesët delikate të trupit si barku dhe këmbët, ndërsa ushtarët qëndronin plotësisht të palëvizur.
Shpërbërjen e shkopinjve të drurit mbi trupat e ushtarëve gjatë luftimeve të sinkronizuara.
Kamerat janë fokusuar vazhdimisht te Kim Jong-un, i cili i ulur në një kolltuk të bardhë, nuk i ka kursyer buzëqeshjet dhe duartrokitjet entuziaste. Lideri suprem është parë duke komentuar me admirim aftësitë e trupave të tij, ndërsa këta të fundit, në fund të shfaqjes, janë mbledhur rreth tij me brohoritje dhe slogane besnikërie.
Ekspertët e shohin këtë jo thjesht si një shfaqje artesh marciale, por si një mjet të fuqishëm propagande. Përmes këtyre pamjeve, Korea e Veriut synon të tregojë se ushtria e saj zotëron një disiplinë dhe forcë fizike “të pathyeshme”, duke dërguar një mesazh të qartë gatishmërie për çdo lloj konflikti.
