Kur vendi fqinj ka ngritur alrmin për murtajën e bagëtive të imëta, pas një rasti në vendin tonë, Shqipëria duket se e ka mbajtur të fshehur atë
GREQI – Alarm në njësitë e blegtorisë në Epir pas konfirmimit të një rasti murtaje në rajonin e Dibrës të Shqipërisë.
Afërsia e shpërthimit sipas mediave greke me kufirin grek i vë shërbimet veterinare dhe prodhuesit në gatishmëri maksimale, veçanërisht në Bashkitë e Pogonit, Konicës dhe Filatit.
Shërbimi Veterinar Rajonal i Epirit paralajmëron se “Peste des Petits Ruminants” është një sëmundje virale shumë ngjitëse që kërcënon drejtpërdrejt bagëtinë. Autoritetet po bëjnë thirrje për masa të menjëhershme të biosigurisë në ferma, pasi rreziku i hyrjes së sëmundjes në Epir konsiderohet i lartë.
Sipas udhëzimeve, fermerët e bagëtive duhet të zbatojnë sa vijon:
Mbikëqyrje Aktive: Inventarizim i plotë i bagëtive dhe ekzaminim klinik i të gjitha deleve dhe dhive.
Mbikëqyrje Pasive: Raportim i menjëhershëm te veterineri i simptomave të dyshimta (ethe, diarre, lezione orale) ose rritje e ngordhjeve. Zbulimi i hershëm shpëton jetë!
Biosiguri e rreptë: Rrethimi i njësive, dezinfektimi i rrotave dhe këpucëve të automjeteve, si dhe përdorimi i veshjeve mbrojtëse.
Kontrolli i Lëvizjes: Kufizim i hyrjes për vizitorët dhe tregtarët. Ndalohet lëvizja e kafshëve pa miratim zyrtar.
Kujdes në kufij: Vigjilencë absolute për trafikimin e paligjshëm të kafshëve dhe kontaktin me ripërtypës të huaj ose të egër.
Industria blegtorale e Epirit, “shtylla kurrizore” e ekonomisë lokale, nuk mund t’i rezistojë një goditjeje tjetër. Autoritetet theksojnë: “Mbroni kopenë tuaj – Mbroni rajonin tonë”.
Për çdo incident të dyshimtë, prodhuesit duhet të kontaktojnë menjëherë shërbimet veterinare lokale.
