Një incident i rëndë kibernetik ka goditur industrinë globale të futbollit, duke ekspozuar një sasi të madhe të dhënash tepër sensitive që u përkasin figurave kryesore të këtij sporti. Sipas raportimeve nga mediet ndërkombëtare dhe burime të specializuara në sigurinë digjitale, mbi 150 mijë dokumente konfidenciale janë bërë publike në internet.
Mes personave të prekur përfshihen emra të njohur të futbollit botëror si Son Heung-min, Lee Kang-in, Mehdi Taremi dhe Neymar Jr, si dhe presidenti i FIFA-s, Gianni Infantino. Dokumentet e publikuara përmbajnë materiale shumë sensitive, duke përfshirë kopje pasaportash, kontrata profesionale, adresa email-i dhe të dhëna të tjera personale.
Ekspertët e sigurisë e cilësojnë këtë si një nga shkeljet më serioze të të dhënave në historinë e sportit. Publikimi i këtyre informacioneve në forume të lidhura me krimin kibernetik rrit ndjeshëm rrezikun për abuzime të mundshme, si vjedhja e identitetit, mashtrimet financiare dhe përdorimi i paautorizuar i të dhënave personale.
Sipas raportimeve, materialet e hakuara janë të strukturuara në mënyrë të organizuar, të ndara sipas shteteve dhe të shoqëruara me dosje individuale. Kjo ka shtuar dyshimet se nuk bëhet fjalë për një rrjedhje aksidentale, por për një depërtim të drejtpërdrejtë në sistemet e brendshme të disa organizatave sportive dhe klubeve.
Grupi i njohur si “ShinyHunters” ka marrë përgjegjësinë për sulmin, duke e cilësuar atë si “shkeljen më të madhe në historinë e futbollit”. Ekspertët e sigurisë paralajmërojnë se pasojat mund të jenë të gjera, duke prekur jo vetëm individët e përfshirë, por edhe strukturën e sigurisë së futbollit ndërkombëtar në tërësi.
