Aksidenti tragjik në Durrës ku humbën jetën dy të mitur dhe një tjetër mbeti i plagosur rëndë, trondidti komunitetin lokal, ndërsa qyteti është veshur në zi në ditën e përcjelljes së viktimave për në banesën e fundit.
Ceremonia mortore është zhvilluar mes dhimbjes së madhe të familjarëve, miqve dhe qindra qytetarëve që kanë shkuar për t’u dhënë lamtumirën dy vogëlushëve. Atmosfera ka qenë e rënduar, me lot dhe heshtje, ndërsa familjet përballen me një humbje të pazëvendësueshme.
Të afërm të viktimave kanë folur për mediat, duke shprehur tronditjen dhe dhimbjen e thellë. Një banor i zonës ka deklaruar se autori i dyshuar i aksidentit ka qenë më herët problematik dhe sipas tij, i njohur edhe nga autoritetet, duke ngritur shqetësime për mungesën e masave parandaluese.
“Jemi të tramaksur, si në filma. Nuk kemi fjalë. Nuk ishte hera e parë. Kur ishte i pirë, nuk dinte çfarë bënte,” është shprehur ai, duke kërkuar reagim nga institucionet.
Ndërkohë, një tjetër banor ka theksuar se familja e njërit prej viktimave po përballej edhe me një situatë të vështirë shëndetësore, pasi babai i tij ndodhej i sëmurë në Itali. Ai ka shtuar se komuniteti ndihet i lënduar dhe i lënë në pasiguri.
“Jemi të tronditur si lagje. Është edhe për faj të shtetit, pasi ishte njoftuar më herët për këtë rast,” është shprehur ai.
Një familjar i viktimave ka treguar se dhimbja është e papërshkrueshme, veçanërisht pasi një tjetër fëmijë i plagosur rëndë ndodhet ende në spital.
“E gjithë familja është e shokuar. Dhimbja është shumë e madhe. Djali tjetër është në spital,” ka thënë ai.
