Kryetari i Shtabit të Përgjithshëm të Forcave të Armatosura të SHBA-së, gjenerali Dan Caine, ka shprehur privatisht shqetësimin se Uashingtoni duhet të gjejë një rrugëdalje nga konflikti me Iranin.
Sipas tre burimeve të njohura me diskutimet, Caine ka paralajmëruar zyrtarë të lartë të administratës amerikane se një përshkallëzim i mëtejshëm i konfliktit mund të shkaktojë kundërsulm nga Teherani. Ai dyshon gjithashtu se vetëm fuqia ajrore mund të mos jetë e mjaftueshme për të arritur objektivat e deklaruara nga presidenti Donald Trump.
“Caine po kërkon një rrugëdalje”, tha një prej burimeve për CNN.
Sipas raportimeve, gjenerali amerikan i ka diskutuar shqetësimet e tij me zyrtarë të lartë të administratës, mes tyre drejtorin e CIA-s, John Ratcliffe, sekretarin e Shtetit, Marco Rubio, dhe zëvendëspresidentin JD Vance.
Diskutimet janë përqendruar edhe te kufizimet e opsioneve ushtarake që ka në dispozicion Uashingtoni, përfshirë skenarin e mundshëm të dërgimit të trupave amerikane në terren.
Presidenti Donald Trump ka kundërshtuar vazhdimisht dërgimin e trupave tokësore në Iran dhe ka sinjalizuar se fushata ajrore mund ta detyrojë Teheranin të pranojë një marrëveshje sipas kushteve të Uashingtonit.
Megjithatë, shqetësimet e shprehura nga Caine dhe zyrtarë të tjerë të administratës tregojnë se brenda qeverisë amerikane ka dyshime nëse objektivat e Trump mund të arrihen vetëm përmes bombardimeve ajrore.
Sipas burimeve, administrata po shqyrton alternativa të tjera, ndërsa përpjekjet për të shmangur një përshkallëzim të mëtejshëm të konfliktit mbeten një nga çështjet kryesore në diskutimet e niveleve të larta të sigurisë kombëtare amerikane.
