Rrobat dhe aksesorët e përdorur gjatë xhirimeve të filmit të shumëpritur “Djalli vishet me Prada 2” do të dalin në një ankand online.
Sipas një njoftimi të shtëpisë së ankandeve Christie’s dhe studiove kinematografike 20th Century Studios, ankandi zhvillohet në bashkëpunim me protagonisten e filmit, Meryl Streep, dhe do të zhvillohet ekskluzivisht online nga 1 deri më 15 shtator 2026.
Të ardhurat do t’i dhurohen Komitetit për Mbrojtjen e Gazetarëve (CPJ), me seli në Nju Jork, si dhe Këshillit të Dizajnerëve të Modës së Amerikës (CFDA).
Në ankand përfshihen krijime të modës së lartë dhe aksesorë luksozë që shfaqen në film dhe janë veshur nga Meryl Streep, Anne Hathaway, Emily Blunt, Stanley Tucci, Simone Ashley dhe Lady Gaga.
Ndër artikujt më të spikatur është një palë këpucë të kuqe Valentino Garavani Rockstud, të firmosura dhe autentike, të cilat Meryl Streep i ka veshur në rolin e Miranda Priestley. Në koleksion përfshihet gjithashtu një pallto me thekë nga Dries Van Noten, pjesë e koleksionit Vjeshtë/Dimër 2025, si dhe një xhaketë bardhezi nga Schiaparelli.
Ndër pjesët e tjera të ankandit janë një fustan Gabriela Hearst Niki, i veshur nga Anne Hathaway, një byzylyk Elsa Peretti, i vendosur nga Emily Blunt, si dhe një fustan maxi me pupla nga Bad Binch TongTong, i dizajnuar nga Terrence Zhou, të cilin Lady Gaga e ka veshur në videoklipin “RUNWAY”.
Në shitjen online përfshihen gjithashtu krijime nga Dolce & Gabbana, Dior, Elie Saab, Vhernier dhe Fendi, si dhe pulovra klasike ngjyrë blu-jeshile nga J.Crew.
Koleksioni nga “Djalli vishet me Prada 2” do të prezantohet gjithashtu përmes një ekspozite fizike në shtëpinë e ankandeve Christie’s në Nju Jork, nga 8 deri më 13 shtator.
