North West, vajza 13-vjeçare e Kim Kardashian dhe Kanye West, ka publikuar një këngë të re rap, në të cilën flet për “tradhtinë” dhe “dhimbjen”, pak kohë pasi anuloi turneun e saj të parë.
Në videoklipin e këngës “Aishite”, që në japonisht do të thotë “më duaj” dhe u publikua të enjten, më 6 gusht, adoleshentja shfaqet duke lëvizur në korridoret e një shkolle dhe në një sallë lojërash arcade, në një klip me frymëzim nga filmat horror.
Në video, North shfaqet me fytyrën të lyer me të bardhë dhe me një motiv kafke të zezë. Në një moment, ajo buzëqesh duke treguar dhëmbët e lyer në të zezë. Ajo shfaq gjithashtu piercing-et në gishtat e saj, ndërsa në skena të tjera shfaqet me një paruke të gjatë blu dhe me gërsheta.
Në vargun e parë të këngës, West flet për ndjesinë e të qenit vetëm dhe të ndjekur, duke iu referuar edhe tradhtisë:
“Ah, askush nuk do të më shpëtojë / Dhe kjo më çmend / Pse nuk mund të iki? Pse më ndjekin? / Thjesht më doni, të gjithë më tradhtojnë.”
Më pas, ajo përmend imazhe të dhunshme dhe presionin psikologjik që përjeton.
“Shoh gjak çdo ditë / Çfarë? Dhe kjo më çmend / Po, nuk mund të iki sepse më ndjekin.”
Në vargun pasues, këngëtarja rikthehet te tema e tradhtisë, duke kënduar:
“Ajo shtiret, nuk do të më përdorin më / Nuk mund të jem shoqe me askënd, nuk mund të lejoj askënd të hyjë në jetën time.”
“Nuk mund të mbështetem te askush, dhimbja nuk do të përfundojë.”
Shumë prej komenteve poshtë videoklipit shprehën shqetësim për North, për shkak të tematikës së errët të këngës.
“Kjo këngë është vërtet e trishtueshme. Edhe unë kam qenë në depresion në moshën 13-vjeçare. Shpresoj që të marrë diku dashurinë dhe mbështetjen që i nevojitet”, shkroi një komentues.
“Dhimbja ndihet në këtë këngë. Më vjen keq për të! Shpresoj të marrë ndihmën që i nevojitet”, shkroi një tjetër.
Muajin e kaluar, North anuloi turneun e saj të parë, vetëm pak ditë para nisjes së planifikuar.
“Isha vërtet e emocionuar që do të bëja turne me Molly Santana”, shkroi ajo në një postim që u fshi më vonë, duke u premtuar fansave “diçka të veçantë”.
“Shihemi së shpejti”, përfundonte mesazhi i 13-vjeçares.
North West ishte planifikuar të zhvillonte një turne me 14 ndalesa së bashku me Molly Santana, nën titullin “Kimokawaii Tour”.
