Të paktën 132 persona kanë humbur jetën dhe 570 të tjerë janë plagosur pas tërmetit shkatërrues me magnitudë 7.4 që goditi Kolumbinë perëndimore.
Ekipet e kërkim-shpëtimit vijojnë operacionet në zonat më të dëmtuara, ndërsa autoritetet paralajmërojnë se bilanci i viktimave mund të rritet, pasi dyshohet se persona të tjerë mund të jenë ende të bllokuar nën rrënoja.
Qyteti i Pereiras është ndër zonat më të prekura, me të paktën 60 viktima të raportuara. Në të gjithë vendin janë shembur të paktën 86 ndërtesa, ndërsa më shumë se 1,500 banesa kanë pësuar dëmtime.
Pesë qytete, Pereira, Cali, Quibdo, Manizales dhe Armenia, janë vendosur në alarm të kuq për shkak të situatës së rëndë.
Ekipet e shpëtimit, zjarrfikësit dhe forcat ushtarake janë angazhuar në operacionet e kërkimit në ndërtesat e shembura. Në disa zona, komunikimi dhe transporti janë dëmtuar rëndë, duke vështirësuar vlerësimin e plotë të pasojave.
Dëme të konsiderueshme janë raportuar edhe në struktura shëndetësore. Objektet pediatrike të një spitali në Cali kanë pësuar dëmtime, duke shkaktuar mobilizimin e shërbimeve të emergjencës.
Qeveria kolumbiane e ka shpallur vendin në gjendje katastrofe kombëtare dhe ka dërguar forca ushtarake në zonat e prekura, me prioritet shpëtimin e personave të bllokuar dhe ofrimin e ndihmës për të prekurit.
16 persona të bllokuar për gjashtë orë në teleferik
Një prej operacioneve më dramatike të shpëtimit u zhvillua në Pereira, ku 16 persona mbetën të bllokuar për rreth gjashtë orë në kabinat e një teleferiku ajror pas goditjes së tërmetit.
Pasagjerët u evakuuan me sukses rreth orës 13:30 sipas kohës lokale. Sistemi i teleferikut është pezulluar deri në përfundimin e kontrolleve të sigurisë.
Një situatë e ngjashme u raportua edhe në Manizales, ku pasagjerët e një teleferiku u evakuuan dhe shërbimi u pezullua për shkak të dëmtimeve strukturore.
Shtatë aeroporte jashtë funksionit
Tërmeti ka shkaktuar probleme të mëdha edhe në transport. Shtatë aeroporte në Cali, Pereira, Manizales, Quibdo, Armenia, Cartago dhe Buenaventura kanë pezulluar përkohësisht fluturimet për shkak të kontrolleve të sigurisë.
Mbyllja e aeroporteve vështirëson edhe transportin e ekipeve të shpëtimit, personelit mjekësor dhe ndihmave drejt zonave më të goditura.
Tërmeti u ndje edhe në Bogota dhe vendet fqinje
Tërmeti me magnitudë 7.4 goditi Kolumbinë të hënën në mëngjes, me epiqendrën pranë San José del Palmar, në departamentin Chocó, rreth 240 kilometra në perëndim të Bogotas.
Dridhjet u ndjenë në një zonë të gjerë dhe prekën edhe Ekuadorin, Panamanë dhe Venezuelën.
Në Bogota, mijëra banorë u larguan nga ndërtesat dhe dolën në rrugë pas aktivizimit të alarmeve. Autoritetet thanë se në kryeqytet janë konstatuar kryesisht dëmtime sipërfaqësore dhe nuk ka shenja për shkatërrime të përhapura.
Tërmeti është një nga sfidat e para të mëdha për presidentin e ri të Kolumbisë, Abelardo de la Esperanza, i cili u betua në detyrë vetëm pak ditë më parë.
Presidenti deklaroi se ka marrë personalisht drejtimin e reagimit ndaj emergjencës dhe urdhëroi krijimin e një qendre të unifikuar operacionale për koordinimin e ekipeve të shpëtimit.
Ai njoftoi gjithashtu se do të udhëtonte drejt zonave më të prekura.
“Nuk jeni vetëm. Shteti është i pranishëm dhe vepron”, deklaroi presidenti.
Banorët e zonave të goditura kanë përshkruar momente paniku, ndërsa shumë prej tyre kanë mbetur pa energji elektrike dhe pa shërbim telefonik.
https://platform.twitter.com/embed/Tweet.html?creatorScreenName=topchanneltv&dnt=false&embedId=twitter-widget-0&features=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%3D%3D&frame=false&hideCard=false&hideThread=false&id=2086856815879344263&lang=en&origin=https%3A%2F%2Ftop-channel.tv%2F2026%2F08%2F11%2Ftermeti-shkaterrues-ne-kolumbi-shpallet-gjendja-e-katastrofes-kombetare-shkon-ne-132-numri-i-te-vdekurve-vijojne-kerkimet-per-te-mbijetuarit%2F&sessionId=65a7d98a59a63144048cd27e40686ade70c5b3b2&siteScreenName=tchbreakingnews&theme=light&widgetsVersion=6a3ad42b224df%3A1778106238597&width=550px
SHBA-ja ofron 15.5 milionë dollarë ndihmë
Ndihma ndërkombëtare për Kolumbinë ka nisur të mobilizohet. Shtetet e Bashkuara kanë njoftuar 15.5 milionë dollarë ndihmë, e cila përfshin strehime të përkohshme, ushqime, pajisje mbrojtëse dhe mbështetje për vlerësimin e dëmeve.
Sekretari amerikan i Shtetit, Marco Rubio, deklaroi se administrata Trump po e monitoron nga afër situatën dhe është e gatshme të mbështesë popullin kolumbian.
Edhe Meksika dhe Izraeli kanë shprehur gatishmërinë për të ofruar ndihmë, ndërsa oferta solidariteti kanë ardhur edhe nga vende të tjera.
Ndërkohë, Ministria e Jashtme greke ka shprehur ngushëllimet për familjet e viktimave dhe solidaritetin me të plagosurit dhe ekipet e shpëtimit.
Operacionet e kërkim-shpëtimit vijojnë pa ndërprerje, ndërsa autoritetet kolumbiane paralajmërojnë se bilanci i viktimave mund të ndryshojë në orët në vijim, teksa ekipet arrijnë në zonat e izoluara dhe vijojnë kërkimet nën rrënoja.
