“Mirëmbrëma, jam Roberto Mollo. Kam pasur hajdutë në shtëpi, u mbrojta… njëri ka vdekur.”
Ishin pikërisht këto fjalët e 35-vjeçarit Roberto Mollo në telefonatën e numrit të emergjencës 112, pasi qëlloi me armë zjarri ndaj një grupi grabitësish që dyshohet se tentuan të hynin në banesën ku ai jetonte, në Baldissero d’Alba, në provincën e Cuneos, Itali.
Ngjarja ndodhi në orët e para të mëngjesit të së dielës, më 20 shtator. Sipas hetimeve paraprake, Mollo, i cili punon si shofer kamioni, qëlloi 13 herë ndaj personave që po tentonin të kryenin një vjedhje në një banesë në rikonstruksion.
Një prej plumbave goditi 36-vjeçarin shqiptar Gjovalin Lazri, i cili humbi jetën.
Telefonata e Mollo-s me 112 është bërë publike nga televizioni italian “Tg1”. Në regjistrim, 35-vjeçari dëgjohet duke i shpjeguar operatorit se çfarë kishte ndodhur.
“Kam pasur frikë, jam i dëshpëruar. Po më silleshin nëpër shtëpi”, dëgjohet të thotë ai.
Më pas, telefonata kalon te karabinierët. Mollo u tregon atyre se ishte i armatosur dhe se kishte qëlluar në përpjekje për t’u mbrojtur.
“Unë jam i armatosur, u mbrojta. Tani është një person në tokë, nuk e di nëse ka vdekur”, shprehet ai.
Kur pyetet nëse kishte përdorur armën, 35-vjeçari përgjigjet: “Po, i qëllova”.
“Ky person ishte i maskuar, ishte jashtë në oborr. E mbylla derën, por u tremba dhe qëllova”, shton Mollo.
Sipas autoriteteve italiane, Gjovalin Lazri u gjet pranë daljes së oborrit të banesës. Ai kishte veshur një kapuç dhe doreza, ndërsa me vete mbante edhe një elektrik dore.
Gjatë kontrollit, në xhepat e tij u gjet një kaçavidë, si dhe rreth 2 mijë euro. Hetuesit po verifikojnë nëse kjo shumë parash mund të ketë lidhje me grabitje të tjera, raportojnë mediat italiane.
Dyshimet e para të hetuesve janë se grupi që veproi në Baldissero d’Alba mund të jetë pjesë e një bande “grabitësish në lëvizje”, që udhëtojnë nga një zonë në tjetrën dhe kryejnë disa vjedhje brenda së njëjtës natë.
Hetimet vijojnë për të rindërtuar me saktësi dinamikën e ngjarjes, ndërsa autoritetet po punojnë për identifikimin dhe kapjen e personave të tjerë që dyshohet se kanë marrë pjesë në tentativën e grabitjes.
