Programi Botëror i Ushqimit i Kombeve të Bashkuara (WFP) njoftoi se do të reduktojë operacionet humanitare në Gaza për shkak të mungesës së fondeve, duke bërë që rreth 500 mijë persona të humbasin aksesin në ndihmën ushqimore.
Sipas deklaratës së agjencisë, WFP do të kufizojë ndihmën e saj nga 1.6 milionë në 1.1 milionë njerëz në muaj, në një kohë kur territori palestinez vijon të përballet me pasoja të rënda humanitare pas luftës.
“Për shkak të mungesës së fondeve, gjysmë milioni njerëz do të humbasin aksesin në ndihmë ushqimore”, bëri të ditur agjencia e OKB-së, duke theksuar se reduktimi është i nevojshëm për të siguruar që burimet e mbetura të përdoren për një periudhë sa më të gjatë.
Sean Hughes, drejtor i WFP-së në territoret palestineze, deklaroi për Agjencinë Franceze të Lajmeve (AFP) se organizata po detyrohet të marrë vendime të vështira për shkak të mungesës së financimit.
Ai u bëri thirrje komunitetit ndërkombëtar që të mos e zhvendosë vëmendjen nga situata në Gaza, ku nevojat humanitare mbeten të mëdha.
Reduktimi i ndihmës vjen në një moment të vështirë për popullsinë civile, e cila varet nga mbështetja humanitare për sigurimin e ushqimit dhe nevojave bazë. Kufizimi i operacioneve të WFP-së pritet të shtojë presionin mbi familjet që përballen me pasiguri ushqimore dhe mungesë të burimeve jetike.
