Ndarja nga jeta e shkrimtarit dhe studiuesit Izet Duraku ka sjellë reagime dhe mesazhe ngushëllimi. Mes tyre është edhe ai i ish-politikanit socialist Namik Dokle, i cili ka kujtuar mikun e tij me fjalë të ndjera.
“Do të na mungosh, Izet Duraku! Lamtumirë për një mik…”, shkruan Dokle, duke shprehur dhimbjen për humbjen e një njeriu që la gjurmë te familja, miqtë dhe jeta kulturore shqiptare.
Në mesazhin e tij, ai kujton buzëqeshjen, diturinë, mendimin e mprehtë dhe debatet e qeta e të mençura të Durakut, si edhe dashurinë e madhe që ai kishte për vendlindjen.
Dokle vë në pah veçanërisht përkushtimin e shkrimtarit ndaj Lumës, historisë, traditave dhe folklorit të saj, për të cilat ai punoi për vite me radhë, duke lënë pas libra dhe studime të shumta.
Ai kujton gjithashtu kontributin e Durakut në letërsinë shqipe dhe punën e tij me revistën letrare “ILLZ”, e cila për vite me radhë u bë një hapësirë e rëndësishme për autorët shqiptarë dhe të huaj.
“Dheun të lehtë do ta kesh se e deshe aq shumë këtë tokë të shtrenjtë. Lamtumirë, mik i dashur!”, përfundon Namik Dokle mesazhin e tij të lamtumirës.
Izet Duraku ishte shkrimtar, poet, gazetar dhe studiues. Përveç krijimtarisë letrare, ai dha një kontribut të rëndësishëm në dokumentimin e historisë dhe trashëgimisë kulturore të Lumës, duke lënë pas një pasuri të çmuar në letërsi dhe studime.
