Dy kompani nga Milano dhe Lecco kanë përfunduar nën hetimin e Antimafias, të akuzuara për pastrim parash që dyshohet se vinin nga një rrjet ndërkombëtar i trafikut të kokainës, që vepronte mes Italisë, Holandës, Gjermanisë dhe Shqipërisë.
Organizata përbëhej pothuajse tërësisht nga shtetas shqiptarë, ndërsa paratë pastroheshin në Itali dhe më pas dërgoheshin përsëri në Shqipëri.
Bëhet fjalë për një aktivitet kriminal me përmasa shumë të mëdha, i cili i ka sjellë organizatës kriminale mbi 14 milionë euro. Dy kompanitë me seli në Lecco janë sekuestruar.
Operacioni “Caveau 38”
Operacioni, i quajtur “Caveau 38”, u zhvillua nga Drejtoria e Antimafias së Milanos (DDA), në bashkëpunim me autoritetet shqiptare.
Hetimet çuan në zbulimin e një organizate kriminale, të përbërë kryesisht nga shtetas shqiptarë, e cila dyshohet se ishte e përfshirë në: Një organizatë kriminale me veprimtari të strukturuar; Trafik ndërkombëtar të kokainës në një sasi prej rreth 240 kilogramësh; Mbledhjen dhe transferimin drejt Shqipërisë të parave cash, në një vlerë që tejkalon 14 milionë euro.
Guardia di Finanza (Policia Financiare italiane) ka ekzekutuar një urdhër urgjent për sekuestrimin paraprak të dy kompanive në Lecco, të cilat dyshohet se përdoreshin nga organizata kriminale shqiptare.
Si pastroheshin paratë e drogës?
Pastrimi i parave dyshohet se është kryer edhe përmes blerjes së shufrave të arit, në një sasi prej afro 8 kilogramësh.
Ari blihej në Itali nga një kompani që ushtronte aktivitet në përpunimin e metaleve të çmuara dhe kishte seli në Milano dhe Alessandria. Edhe kjo kompani ka përfunduar nën sekuestro.
Pasi pastroheshin përmes aktiviteteve të tjera të ligjshme, paratë transferoheshin më pas në Shqipëri.
Kompania e dytë e sekuestruar dyshohet se shërbente si një lloj “kasaforte” e grupit kriminal, duke investuar paratë në sektorin e pasurive të paluajtshme (ndërtime dhe prona).
Për kompanitë e sekuestruara është emëruar një administrator gjyqësor, i cili do të kujdeset për administrimin e tyre.
Në kuadër të këtij hetimi janë marrë nën hetim 52 persona, përveç dy kompanive, për ngjarje që dyshohet se kanë ndodhur gjatë periudhës 2019–2022.
Sipas hetuesve, për organizimin e transaksioneve të drogës dhe të parave cash janë përdorur edhe sisteme të komunikimit të enkriptuar.
Gjatë operacionit janë sekuestruar gjithashtu:
Mbi 1.5 milionë euro para të gatshme.
Sasi kokaine, heroine dhe marijuane, në total rreth 32 kilogramë.
Janë arrestuar në flagrancë gjashtë persona./ IlGiorno
