Gjykata Kushtetuese në Slloveni, vendosi më 6 dhjetor që vaksinimi i detyrueshëm për punëtorët e sektorit publik në vend, është jokushtetues.
Qeveria sllovene planifikonte të zbatonte vendimin për vaksinimin e detyrueshëm nga 1 tetori, por Gjykata Kushtetuese e bllokoi deri në një vendim përfundimtar.
Në arsyetim, Gjykata Kushtetuese e Sllovenisë thotë se “vaksinimi i detyrueshëm fillimisht kërkon ndryshime në ligjin për sëmundjet ngjitëse”, raporton agjencia e lajmeve Reuters.
Zyrtarët e qeverisë nuk e kanë komentuar vendimin e Gjykatës Kushtetuese, teksa Sllovenia ka vetëm rreth 55% të popullsisë së vaksinuar prej rreth 2 milionë banorëve.
Kjo shifër është nën mesataren evropiane.
Që nga muaji tetor, Sllovenia ka shënuar rritje të shpejtë të rasteve të reja të të infektuarve në ditë nga COVID-19, ndonëse në ditët e para të dhjetorit u shënua rënie e lehtë.
Vetëm më 5 dhjetor në Slloveni u regjistruan 1,116 raste të reja.
