Nga Zef Ndreka
“Apres moi , le deluge”!
“Pas meje , kjameti”!
– Inskenimi i një mega Dushku të ri…
Zgjedhjet e 6 marsit për kryebashkiakë në gjashtë bashki nuk janë gjë tjetër veçse votime ku deformohet vullneti politik i votuesve !
Të gjithë i kujtojmë zgjedhjet e famshme të Dushk-ut , ku pak vota arritën të japin disa deputetë , nëpërmjet tjetërsimin të votës !
Kështu edhe këto zgjedhje që nuk organizohen në një komunë , por , plot në 6 bashki , loja sapo ka filluar ! Trafikim votash , transferim i tyre nga një parti në tjetrën dhe deformim përfaqësimi !
Ky ishte Dushku i vitit 2005 .
Tani , në 2022 , duket se politika po iskenon një Dushk të ri , një mega dushk nga pasiguria e votave !
A do ta arrijë ?!
Pjesa e Partisë Demokratike që mbështet Berishën dhe komisionin e rithemelimit , nëpërmjet kandidatëve të vet , i kërkojnë elektoratit në tërësi dhe veçanërisht atij demokrat , të votojnë LSI-në dhe PDK , ose “Shtëpia e Lirisë” !
Thirrje kjo e hapur për të deformuar vullnetin e zgjedhësve , përderisa PD-ja garon si parti !
Si është e mundur marrëveshja e Berishës me Metën kundër PD-së ?!
Pikerisht , për shkak të problemeve jo të vogla në kampin demokrat , palët garojnë të përçarë pa ditur ënde se kush mund t’i gëzohet fitores apo humbjes . Nga mënyra se si filloi fushata , edhe pse nuk përbën ndonjë rëndësi politike apo test force elektorale , është paraqitur mëse e turpshme .
Njollosja në këtë mënyrë e procesit nga demokratët e foltorës , kalon masën e turpit dhe tregon qartë se motoja qeverisëse e Berishës si aktor i vjetër qeverisës , nuk ndryshon shumë nga ajo e Luigjit të pesëmbëdhjetë i cili tha shprehjen e famshme : “apres moi , le deluge” (në shqip : “pas meje , le të bëhet kjameti”). Natyrshëm lind pyetja : ç’fitojnë demokratët nga donkishotë të tillë ?! Do të ishte naivitet të mendohej se ata shpresojnë të arrijnë fitore qoftë edhe në një komunë . As të arrijnë balancën me pjesën tjetër të Partisë , megjithse janë në koalicion shumë parti .
Kjo thjeshtë nuk mund të ndodhë . Berisha para 10 vitesh është larguar si humbës me 1 milion vota kundër !
Është i pamundur rikthimi i tij . Vetëm bufi nuk e shikon ! Nëse nuk do të ishin mbështetur tek ky “aleat” hileqar , demokratët të bashkuar , mund të ishin me 6 mars fituesit e vetëm të zgjedhjeve pavarësisht nga faktori LSI dhe faktorët e tjerë politikë në vënd .
Demokratët ndodhën sot në një pozicion politik të cilin nuk e ka provuar asnjë parti tjetër shqiptare !
Më shumë se llogaritë e kryebashkiakëve , Berishën dhe grupin e korruptuar të komisionit te rithemelimit i shqetëson interesi përsonal të cilët e kthyen shumë lehtë në mollë sherri në PD .
Demokratët ndjehen të pasigurt për fitorën për shkak të trafikimit të votave të tyre majtas . Kjo do të mbetet një bukëshkalësi tipike . Demokratët për këtë duhet të ndërgjegjësohen , se nga njëra anë përçarja dhe njëkohësisht koalicioni me parti ekstreme të majtë si LSI e ndyn , e bën pis atë .
Partitë e vogla si LSI , PDK , PR etj të cilat tashmë e kanë bërë “faqën rrogoz” , por edhe vetë këtë koalicion laraman që mbahet me paterica , duhen braktisur .
Për demokratët ka vetëm një zgjidhje . Ata duhet t’a fokusojnë të gjithë vëmendjen drejt bashkimit , përfaqësimit ambicioz e dinjitoz të kandidatëve në fushatë .
Gara për kryebashkiakët duket se po zhvillohet po aq e ethshme sa edhe fushatat e tjera .
Të nisura , njëra palë me Bashën nga dëshira për stabilitet , dhe pala tjetër me Berishën non grata nga dëshira për të shkaktuar destabilitet , dy kampet e PD-së vazhdojnë përplasjen .
Nga ana e tyre , qytetarët shqiptarë të lodhur , po presin të shohin më së fundi një zgjidhje përfundimtare rreth një grupi politikanësh të rinjtë . Dhe pjesa tjetër të lirojë vëndin , të shkojë në shtëpi .
Shqiptarët që në këto zgjedhje , kanë kuptuar dhe kanë vendosur si të votojnë , sepse ka ardhur koha të japin mesazhin e qytetarisë europiane…
