Kryeministri Edi Rama dhe ministri i Ekonomisë, Kulturës dhe Inovacionit, Blendi Gonxhja, ishin sot në eventin HangArt, në ambientet e ministrisë së Kulturës
Gjatë fjalës së tij, Rama theksoi se buxheti për kulturën është rritur, ndërsa shtoi se do të bëjnë një përpjekje të posaçme për të stimuluar edukimin e menaxherëve të kulturës.
“Ndërkohë që kemi rritur buxhetin, jemi duke punuar dhe për një sërë skemash të reja, që besojmë se do t’i vijnë në shërbim njerëzve të kulturës, skenës dhe të aktiviteteve të drejtpërdrejta në të gjitha fushat që mbulon ky institucion. Do të bëjmë një përpjekje të posaçme për të stimuluar edukimin e menaxherëve të kulturës, ndjejmë që ka një hendek ndërmjet aktorëve, protagonistëve, që janë të pjekur dhe kanë gjera interesante për të ndarë me publikun dhe pjesëve të menaxhereve të institucioneve të kulturës që te ne është e mangët.
Është e domosdoshme që të investojmë në këtë drejtim, sepse do të krijojmë hapësira të reja dhe më ambicioze, por pastaj pyetja e madhe që mbetet është ‘si do të arrijmë që këto hapësira t’i kthejmë në hapësira pjellorie dhe begatie sa i përket produkteve që mund të sjellin këto hapësira’. Këtu nuk është çështje as e talenteve, as e parave që duhen investuar për këto hapësira, por dhe mënyra se si këto hapësira menaxhohen”, tha Rama.
Më tej ai përmendi dhe restaurimin e muzeut kombëtar, ku tha se po i nënshtrohet një transformimi rrënjësor, duke u kthyer më pas në një vend jo vetëm për soditje, por edhe për aktivitetet të tjera.
“Për muzeun kombëtar, që do t’i nënshtrohet një transformimi rrënjosur dhe do të jetë një hapësirë ku do strehohen objekte dhe copëza historie, por dhe të krijohet në të përditshmen një aktivitet kërkimesh, ekspozimesh apo debati”, shtoi ai.
Më tej, Rama u ndal dhe tek ndërtimi i Teatrit Kombëtar, ku u shpreh se do të jetë një fabrikë e vërtetë në të gjitha kuptimet.
“Teatri Kombëtar nuk do të jetë thjesht një destinacion me skenë të raskapitur, por është një fabrikë e vërtetë në të gjitha kuptimet”, tha ai.
Në eventin e sotëm u prezantua dhe nisja e edicionit të katërt të Javëve Kulturore Ndërkombëtare CulturAlb, rrjeti i qendrave për promovimin e kulturës shqiptare në botë, programi Kombëtar i Granteve për Kulturën dhe Krijimtarinë.
