The Guardian Edi Rama në rrugën për të fituar mandatin e katërt si Kryeministër
Socialistët po ecin drejt një fitoreje të qartë me 30% të votave të numëruara në zgjedhjet që shihen si thelbësore për shpresat e vendit për t’iu bashkuar BE-së
Kryeministri i Shqipërisë, Edi Rama, është gati për fitore në zgjedhjet e përgjithshme pasi rezultatet paraprake treguan se votuesit e rikthyen atë në pushtet për një mandat të katërt të paprecedentë.
Me 30% të votave të numëruara, partia e Ramës po udhëheq socialistët e majtë drejt një fitoreje tingëlluese ndaj Partisë Demokratike të qendrës së djathtë të Sali Berishës në një sondazh që shihet si thelbësor në përpjekjen e vendit ballkanik për t’u bashkuar me BE. Partia në pushtet numëron 53% të votave krahasuar me 34% për rivalin e saj kryesor të opozitës.
Pjesëmarrja paraprake në zgjedhjet e së dielës ishte pothuajse 42.16%, ose 4% më e ulët se katër vjet më parë.
“Është një rezultat që tejkalon të gjitha pritshmëritë edhe para se të numërohen plotësisht fletët e votimit”, tha një burim në Tiranë. “Fitorja e katërt radhazi është fenomenale. Edi ka arsye të jetë shumë i lumtur.”
Në detyrë që nga viti 2013, Rama kishte bërë fushatë për të përshpejtuar reformat që konsideroheshin jetike për anëtarësimin e shtetit ish-komunist në BE. 60-vjeçari ka premtuar anëtarësimin brenda pesë viteve pas hapjes zyrtare të negociatave të pranimit tetorin e kaluar.
Qëllimi, i parë nga shumë njerëz si shumë ambicioz, është ndihmuar nga dëshira e disa liderëve evropianë për të parë Shqipërinë dhe shtetet e tjera të Ballkanit Perëndimor t’i bashkohen bllokut pas pushtimit rus të Ukrainës.
Presidenti i parë i vendit pas rënies së komunizmit më shumë se tre dekada më parë, Berisha, 80 vjeç, argumentoi se Shqipëria ishte larg gatishmërisë për pranimin në BE. Dikur mjeku personal i diktatorit të ndjerë stalinist Enver Hoxha, kardiologu kishte drejtuar një fushatë të stilit amerikan të mbikqyrur nga konsulentë të sjellë nga Uashingtoni DC, përfshirë Chris LaCivita, strategun republikan që ndihmoi në sigurimin e fitores së Donald Trump në nëntor. Berisha kishte kopjuar madje edhe moton e fushatës së tij “Make Albania Great Again”.
Partia Demokratike bashkoi forcat me 20 grupe të tjera politike me shpresën për të hequr Ramën nga detyra. Por në orët e hershme të së hënës, ndërsa fletët e votimit numëroheshin me dorë, ishte e qartë epërsia e socialistëve.
Analistët theksuan se Partia Socialiste duket se kishte fituar edhe mbështetjen e votuesve jashtë shtetit pasi komuniteti i madh i emigrantëve në Shqipëri u lejua të votonte me postë për herë të parë. Më shumë se 192,000 votuan nga afro 246,000 shqiptarë që ishin regjistruar për të votuar jashtë vendit përpara zgjedhjeve të së dielës në kombin prej 2.7 milionë banorësh.
Rreth 83% e shqiptarëve mbështesin anëtarësimin në BE, mbështetja më e lartë e çdo popullsie në Ballkanin Perëndimor, sipas një sondazhi të Eurobarometrit, publikuar në muajin nëntor.
Rama, i cili shërbeu si kryebashkiak i Tiranës përpara se të merrte drejtimin e partisë – teksa gjallëroi peizazhin e zymtë të kryeqytetit duke i lyer ndërtesat e epokës komuniste me një sërë ngjyrash – e ka krhyer në një prioritet pranimin e vendit në BE. Mbështetësit që merrnin pjesë në mitingjet e tij javore dalloheshin nga bluza të bardha të zbukuruara me një “5” të madhe shumëngjyrësh – që tregon vitet e mbetura deri në 2030 (në fakt, numri i PS në fletën e votimit).
Premtimi për anëtarësim në BE ishte një tërheqje e madhe për votuesit e diasporës, tha ambasadorja e Shqipërisë në Greqi, Luela Hajdaraga.
“Shqiptarët që jetojnë jashtë ishin shumë të etur për të marrë pjesë në këtë proces historik dhe për t’u dëgjuar zëri i tyre,” tha ajo për Guardian. “Në Greqi, veçanërisht, ku çështja e fitimit të shtetësisë ka qenë kaq e vështirë, perspektiva e anëtarësimit të Shqipërisë në BE shihet shumë pozitive.
Rama thotë se Shqipëria, prej dekadash shteti më i izoluar i kontinentit, është “në portat e Europës”. Vendi ka hapur 16 nga 35 kapitujt e negociatave për anëtarësimin në bllok. Por në një vend të goditur nga korrupsioni dhe krimi i organizuar, ai gjithashtu përballet me sfida, jo më pak me emigracionin masiv pasi të rinjtë shqiptarë kërkojnë jetë më të mirë jashtë vendit.
