Protestat kundër bastisjeve të emigrantëve në qytetin e Los Angeles kanë hyrë në ditën e tretë, ndërsa autoritetet kanë shpallur qendrën e qytetit si zonë të paligjshme tubimi. Policia ka urdhëruar protestuesit të largohen nga qendra e LA.
Situata është përshkallëzuar ndjeshëm, disa automjete janë djegur dhe janë raportuar akte plaçkitjeje. Një fotograf britanik ka mbetur i plagosur rëndë pasi është qëlluar me një plumb sfungjeri dhe i është nënshtruar një ndërhyrjeje kirurgjikale.
Presidenti i SHBA, Donald Trump, ka reaguar përmes një deklarate të shkurtër, duke thënë: “Situata në LA duket shumë e keqe” dhe ka shtuar: “Sillni trupat!”.
Ai ka urdhëruar tashmë dislokimin e Gardës Kombëtare në qytet, veprim ky që është ndërmarrë pavarësisht kundërshtimit të guvernatorit të Kalifornisë, Gavin Newsom.
Guvernatori i Kalifornisë, Gavin Newsom, i është përgjigjur një kërcënimi për arrestim nga një anëtar i kabinetit të Trump.
“Cari kufitar i Trump po më kërcënon të më arrestojë sepse flas hapur. Ejani dhe më kapni, o djalë i fortë. Nuk më intereson fare. Kjo nuk do të më ndalojë të mbroj Kaliforninë”, shkruan ai në X.
