Tensionet në Lindjen e Mesme po rriten, teksa udhëheqësi suprem i Iranit, Ajatollah Ali Khamenei, ka lëshuar një paralajmërim të drejtpërdrejtë në mediat sociale, duke i drejtuar një mesazh të prerë Izraelit: “Beteja fillon.”
Paralajmërimi i Khameneit vjen në një kohë kur retorika mes Shteteve të Bashkuara dhe Iranit është intensifikuar ndjeshëm. Presidenti amerikan Donald Trump e ka cilësuar udhëheqësin iranian si një “shënjestër të lehtë”, duke paralajmëruar se “durimi i Amerikës po shteron.” Ai ka kërkuar gjithashtu dorëzimin pa kushte të Iranit, duke shtuar se çdo opsion është në tryezë.
Sipas burimeve për CNN, presidenti Trump po tregohet gjithnjë e më i prirur drejt përdorimit të forcës ushtarake për të goditur objektet bërthamore iraniane, duke u larguar gradualisht nga ideja e një zgjidhjeje diplomatike. Megjithatë, burimet theksojnë se një hapësirë për diplomaci mbetet ende, nëse Irani do të pranojë të bëjë lëshime.
Ndërkohë, situata në terren ka njohur zhvillime dramatike. Forcat ajrore izraelite kanë nisur sulme mbi kryeqytetin iranian, Teheran, ndërsa mbrojtja ajrore iraniane po kundërpërgjigjet për të sprapsur predhat. Mediat lokale raportojnë për shpërthime në qytet.
Po ashtu, Izraeli ka paralajmëruar qytetarët e tij për sulme raketore nga Irani, ndërsa shpërthime janë dëgjuar edhe në Tel Aviv, duke rritur frikën për një përshkallëzim të mëtejshëm të konfliktit.
