Është dita e paradës së krenarisë në Budapest të Hungarisë, ku qeveria e Viktor Orbán e ka shpallur të paligjshme çdo “propagandë LGBT”. Policia ka rritur sigurinë për një kundër-demonstratë të nisur nga lëvizjet neofashiste.
Era e freskon qytetin, i cili është goditur nga një vapë përvëluese ditët e fundit. Por ajri në Budapest mbetet veçanërisht i rëndë sot. Në orën 11, përpara bashkisë së kryeqytetit hungarez, u mblodhën një grup neofashistësh të gatshëm të shqetësonin 50 mijë njerëzit e pritur që do të parakalonin pasdite për Paradën e tridhjetë të Krenarisë në historinë hungareze.
Parada fillimisht u ndalua nga ligji i ri kundër propagandës LGBTQ+ , i miratuar nga Presidenti i ekstremit të djathtë Viktor Orbán, i cili parashikon arrestimin e organizatorëve dhe gjoba deri në 500 euro për pjesëmarrësit. Më pas, ajo u bë “krejtësisht e ligjshme” nga kryetari liberal i Budapestit, Gergely Karácsony , i cili e anashkaloi ndalimin duke e bërë atë një ngjarje të organizuar nga bashkia. Megjithatë, policia ditët e fundit kishte mbështetur urdhrin e Orbán, duke njoftuar ndalimin e marshimit, por duke garantuar sigurinë për kundër-demonstratën e lëvizjeve neofashiste .
Më në fund, dje Gjykata e Lartë rrëzoi urdhrin e policisë. Nëse Parada e Krenarisë është e autorizuar apo jo, mbetet një pikëpyetje e madhe, ajo që është e sigurt është se grupet neofashiste në qytet janë tashmë të gatshme ta bëjnë demonstratën të pamundur në çdo rast.
«Ne kemi të drejtë të demonstrojmë sot, ata jo, ne kemi të drejtë të tregojmë se kombi ynë nuk ka të bëjë me propagandën LGBTQ », thotë me një zë të vendosur udhëheqësi i lëvizjes së ekstremit të djathtë, ultranacionaliste të quajtur «lëvizja rinore e 64 qarqeve». Gabor Kelemen, 36 vjeç, mban një flamur të madh të zi dhe të kuq pas tij që thotë: «Besnikëri, Guxim, Besim».
“Propaganda Lgtbq është e rrezikshme dhe madje agresive”, vazhdon ai, “sot në vend do të ketë shumë terroristë antifashistë nga Gjermania për të sulmuar rrënjët tradicionale të perandorisë hungareze, si dhe ligjin e sotëm.”
Gazetari Végh Attila, nga televizioni gjerman Blikk tha se: “ i pyeta nëse çështja LGBTQ është vërtet problemi më i madh në Hungari në një kohë kur demokracia nuk ekziston. Ata më sulmuan, duke më thënë se nuk mund të bëja këtë lloj pyetjesh dhe thirrën policinë. Kjo është puna ime, por nuk më lanë ta bëja.”
Ndërkohë, flamujt e parë me ngjyrat e ylberit kanë filluar të mbërrijnë në shesh. Ndër të tjerët, do të jenë sekretarja e Partisë Demokratike Elly Schlein, kreu i Azione Carlo Calenda, drejtuesi i punëve të jashtme të Italia Viva Ivan Scalfarotto, deri te koordinatorja e të drejtave të Lëvizjes 5 Yje Alessandra Maiorino. Pritet gjithashtu pjesëmarrja e mbi 70 eurodeputetëve dhe një delegacioni nga Amnesty International për të monitoruar që e drejta për të demonstruar të respektohet edhe në vendin më të djathtë të Bashkimit Evropian
