Lidhja Demokratike e Kosovës ka dorëzuar në Prokurorinë Speciale vendimin e Gjykatës Supreme për shfuqizimin e Udhëzimit Administrativ për pajisjet fiskale dhe softuerët elektronikë fiskalë.
Sipas deputetëve të kësaj partie, me këtë vendim Supremja ka konfirmuar se kryeministri dhe ministrat në detyrë kanë shkelur ligjin duke nënshkruar akte nënligjore pasi janë betuar si deputetë.
Vendimin LDK e ka dorëzuar në Prokurori Speciale si dëshmi, pas dorëzimit muaj më parë të 17 kallëzimeve penale për vendimet e marra nga kryeministri dhe ministrat e tij pas certifikimit të zgjedhjeve.
Sipas LDK-së, çdo vendim qeveritar pas certifikimit të zgjedhjeve është i paligjshëm.
Gjykata Supreme një ditë më parë shfuqizoi si të paligjshëm një udhëzim administrativ të nxjerrë nga ministri i Financave në detyrë, Hekuran Murati. Ky udhëzim ishte publikuar pasi Murati kishte marrë mandatin e deputetit.
Sipas Gjykatës Supreme, qeveria në dorëheqje është e autorizuar të kryejë vetëm aktivitetet e domosdoshme dhe të planifikuara në Planin vjetor të punës së Qeverisë dhe në ligjin vjetor për buxhetin, duke përjashtuar miratimin e akteve nënligjore normative të reja.
