Presidenti i Republikës Bajram Begaj, priti këtë të enjte, më 28 gusht, në një takim solemnik luftëtarët e parë për çlirimin e Kosovës, të stërvitur në Shqipëri në vitin 1991, familjarë të martirëve dhe ish-pedagogët ushtarakë që kryen trajnimet e asaj periudhe të rëndësishme historike.
Në fjalën e tij, Kreu i Shtetit vlerësoi guximin, sakrificën dhe rolin vendimtar të këtyre luftëtarëve dhe të ushtarakëve shqiptarë që kontribuuan në përgatitjen politike, logjistike dhe ushtarake. Ai i cilësoi ata si “njerëz që kanë shkruar një faqe të rëndësishme të historisë së kombit shqiptar” dhe theksoi se akti i vitit 1991 duhet të njihet dhe të mësohet në shkolla për të mos mbetur në harresë.
Presidentii Begaj theksoi se nga ky moment, nga kjo sakrificë nisi udha drejt luftës për çlirimin e Kosovës dhe se vepra e të gjithë atyre që guxuan dhe sakrifikuan nuk do të harrohet kurrë.
“Ngjarjet e tetor-nëntorit të ‘91-shit janë fillimi i flakës së madhe të çlirimit të Kosovës. Ishte një sakrificë, sakrificë, së pari, e atyre njerëzve që dolën vullnetarë dhe erdhën për t’u stërvitur në Shqipëri, sakrificë e atyre pedagogëve që i mësuan, trajnuan, i stërvitën, të cilët nuk e dinin se si do të shkonte Shqipëria dhe kur askush nuk e imagjinonte që në ’99-ën ne do të kishim një Kosovë të çliruar”, tha ai.
Në këtë takim, Begaj nderoi veçanërisht figurat e martirëve të këtij grupi, mes të cilëve Adem Jashari, Ilaz Kodra dhe Sali Çekaj, duke siguruar të pranishmit për përkushtimin e tij të vazhdueshëm në vlerësimin e veprës së ish-luftëtarëve: “Unë ju siguroj që do të keni gjithmonë vëmendjen e Presidentit të Republikës së Shqipërisë. UÇK-ja do të jetë patjetër në vëmendjen e shtetit shqiptar.”
Presidenti u shpreh, gjithashtu, se Shqipëria do të mbetet një avokate dhe mbrojtëse e Kosovës në çfarëdo lloj rrethane dhe situate, ndërsa kërkoi që dhe Kosova të dëshmojë pjekurinë e duhur për të ecur përpara.
“Vetë shteti i Kosovës duhet të bëjë shumë më shumë për interesat e brendshme të Kosovës. Tani jemi në një situatë që shpresoj të tejkalohet ngërçi institucional për formimin e institucioneve të reja, pasi Kosova e ka shumë të nevojshme, shumë të domosdoshme për t’u promovouar në arenën ndërkombëtare që është e aftë të bëjë shtetformim dhe të jetë një partner i besueshëm për ata të cilët kontribuuan për shtetin e Kosovës, që janë partnerët tanë strategjik: Shtetet e Bashkuara të Amerikës dhe Bashkimi Evropian.”, shtoi Begaj.
Gjatë bashkëbisedimit, ish-luftëtarët sollën përjetimet e atyre viteve dhe vuajtjet që pasuan nga torturat në burgjet jugosllave apo gjatë luftës së UÇK-së, si dhe i përcollën Kreut të Shtetit mirënjohjen për mbështetjen nga Shqipëria, si dhe për pritjen e rezervuar sot në Institucionit e Presidentit të Republikës./tvklan.al
