Presidentja e Kosovës, Vjosa Osmani, u ka bërë thirrje partive politike për konstituimin e Kuvendit si edhe zgjedhjen e qeverisë.
Osmani deklaroi se çdo ditë e vonuar për zgjidhjen e ngërçit, ëhstë një ditë e humbur për Kosovën dhe perspektivën euroatlantike.
bëri thirrje që Kuvendi të konstituohet dhe qeveria të zgjidhet sa më shpejt, duke theksuar se çdo vonesë është në dëm të vendit dhe të qytetarëve.
“Që Kuvendi të konstituohet urgjentisht, që qeveria të zgjidhet po ashtu urgjentisht, çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën”, tha Osmani pas homazheve te Monumenti i Personave të Zhdukur, në shënim të Ditës Ndërkombëtare të të Zhdukurve me Dhunë.
Zgjedhja e nënkryetarit nga komuniteti serb është hapi i fundit për të konstituuar Kuvendin e Kosovës përfundimisht, por duket se partitë politike nuk po e gjejnë dakordësinë as në këtë pikë.
Dimal Basha u zgjodh në krye të Kuvendit të Kosovës dy ditë më parë, duke i dhënë fund një ngërçi të gjatë politikë. Nënkryetarë janë zgjedhur Albulena Haxhiu, Vlora Çitaku dhe Kujtim Shala nga tri partitë më të mëdha politike në vend, Lëvizja Vetëvendosje dhe dy partitë opozitare, Partia Demokratike e Kosovës dhe Lidhja Demokratike e Kosovës, ndërsa Emilija Rexhepi u zgjodh nënkryetare nga pakicat joserbe.
