Autoriteti Kombëtar për Sigurinë Kibernetike (AKSK) ka njoftuar qytetarët për një fushatë mashtruese “smishing”, që po qarkullon përmes mesazheve telefonike. Mesazhi i rremë u kërkon qytetarëve të kryejnë pagesa online për gjoba të supozuara të qarkullimit rrugor, duke ofruar një link mashtrues.
AKSK bën të ditur se ky nuk është komunikim zyrtar nga institucionet shtetërore dhe u bën thirrje qytetarëve që të mos hapin linqe të dyshimta, të mos japin të dhëna personale dhe të mos kryejnë pagesa në faqe jozyrtare.
Institucioni ka marrë masa për raportimin dhe bllokimin e faqes mashtruese, duke synuar parandalimin e çdo dëmi të mundshëm. Qytetarët që hasin raste të ngjashme ftohen t’i raportojnë menjëherë pranë AKSK-së ose institucioneve të tjera përkatëse.
