Ish-deputeti i PD-së, Dashnor Sula teksa komentoi shkarkimin e Erion Veliajt, tha se ky vendim i marrë sot në mbledhjen e Këshillit Bashkiak mund të jetë një marrëveshje për ta liruar atë nga qelia.
I ftuar në emisionin “Log.” në News24, ai shton se ekziston një pikëpyetje e madhe për rolin e Veliajt dhe sugjeron mundësinë e një “gjysmë-loje” në emër të të drejtave të njeriut dhe mos-prishjes së provave gjatë procesit gjyqësor.
“Përse nuk u shkarkua Erin Veliaj gjatë shtatë muajve nën hetim? Sepse në kërkesën që ka pasur SPAK në masën e sigurisë, edhe Gjykata thotë në vendimin e saj se është prishja e provave dhe presioni ndaj dëshmitarëve nëse ai do të ishte kryetar bashkie në detyrë.
Tani që mbaroi hetimi, që do të thotë se nuk ka rrezik më prishja e provave, nuk paraqet më rrezik Erion Veliaj në aspektin juridik, ndërsa në aspektin politik është tjetër gjë. Ka një pikëpyetje të madhe, ai mund të dalë nga burgu. Ekziston, nuk mund të them 100%, një gjysmë loje që gjatë procesit të gjykimit të ketë ndryshim të masës së sigurimit.
Nuk është cudi që të kemi një marrëveshje të të gjithë aktorëve, përjashtuar vetëm SPAK. Sepse nga ana juridike për të prishur provat tani thuajse është zero meqë cështja ka shkuar në gjykatë. Ekziston që gjykata tani të ndryshojë masën e sigurisë, nga arrest me burg, në arrest shtëpie.” – u shpreh Sula.
Ish deputeti i PD-së, Dashnor Sula thotë se Partia Demokratike është mirë që të mos futet në zgjedhjet e pjesshme që pritet të mbahen për bashkinë e Tiranës, ku PS ka shpallur kandidaturën e Ogerta Manastirliut.
Sipas Sulës, Ilir Alimehmeti dhe Jorida Tabaku që kanë provuar se prodhojnë vota nuk do të futen në garë.
“Për mua Partia Demokratike po të jetë e mençme nuk hyn fare në zgjedhje sepse ka kryer punë. Që është fëlliqur është fëlliqur, por të mos fëlliqet më keq.
Ilir Alimehmeti nuk hyn në zgjedhje, siç nuk ka pranuar as Jorida Tabaku sepse janë dy figurat që u provuan se prodhuan më shumë vota.
Nxirr Albana Vokshin apo Flamur Nokën që nuk kanë bërë kurrë garë, nuk fitojnë”, tha Sula në emisionin Log. në News24.
