Këtë të enjte, 25 shtator, Këshilli i Ministrave ka shkarkuar zyrtarisht nga detyra kryebashkiakun e Tiranës, Erion Veliaj.
Ky vendim i mbledhjes së parë të qeverisë “Rama 4”, që nisi në orën 12:00, hap rrugën për zgjedhjet e parakohshme në kryeqytet.
Tanimë, pritet të shohim nëse Veliaj do ta ankimojë vendimin në Gjykatë Kushtetuese, brenda afatit 15-ditor.
Po si funksionon procedura sipas ligjit
Data e zgjedhjeve për organet e qeverisjes vendore caktohet me dekret nga Presidenti i Republikës. Duke qenë se mandati (3-të) i Veliajt është ndërprerë, zgjedhjet duhet të mbahen jo më parë se 30 ditë dhe jo më vonë se 45 ditë nga data e njoftimit të shkarkimit të tij.
Në çdo rast, Presidenti nxjerr dekretin jo më vonë se 48 orë nga njoftimi përfundimtar për ndërprerjen e mandatit!
Për ta kuptuar, nëse Veliaj (brenda 15 ditëve, që nga shpallja e vendimit) zgjedh të mos e çojë çështjen në Kushtetuese, Presidenti shpall zyrtarisht vakancën.
Në të kundërt, Kreu i Shtetit pret derisa Gjykata të thotë fjalën e fundit.
Zv.kryeministrja e njëherësh Ministrja e Infrastrukturës dhe Energjisë, Belinda Balluku, është caktuar drejtuesja e PS-së për fushatën e zgjedhjeve të pjesshme në Tiranë.
Kjo është lëvizja e radhës lidhur me organizimin e zgjedhjeve në kryeqytet, pas shkarkimit të bujshëm të Erion Veliajt nga Këshilli Bashkiak, vendim që u vulos sot prej Këshillit të Ministrave.
Të mërkurën, 24 shtator, kryeministri Edi Rama zhvilloi dy takime me peshë. Së pari me katër nënkryetarët e bashkisë, kryetaren e komanduar Anuela Ristani dhe Ogerta Manastirliun, kandidatja zyrtare e PS-së për postin e kryetarit të ri.
Nga ky takim me dyer të mbyllura në kryeministri, nuk morëm vesh shumë, ndërsa në orën 18:00 të mërkurën, diskutimi për zgjedhjet e pjesshme në kryeqytet vijoi me praninë e mediave.
Në takimin e tij me deputetë socialistë dhe ministra, kreu i qeverisë theksoi se shkarkimi i Veliajt ishte i domosdoshëm duke sinjalizuar urgjencën për zgjedhje të reja.
Sa i takon Manastirliut, kreu i qeverisë tha se “kandidatët rivalë që do hyjnë në garë të humbur dhe do dalin edhe më të humbur”.
Kujtojmë se Balluku u rikonfirmua në krye të Ministrisë së Infrastrukturës dhe Energjisë në Asamblenë Kombëtare të Partisë Socialiste, më 11 shtator
