Presidenti Donald Trump, ka urdhëruar Sekretarin e Mbrojtjes, Pete Hegseth, të vërë në dispozicion të gjitha trupat e nevojshme për Portland, Oregon, një qytet që ai e përshkroi si “i shkatërruar nga lufta”, për të mbrojtur objektet e Immigration and Customs Enforcement (ICE) që, sipas tij, janë në rrethim nga Antifa dhe “terroristë të tjerë të brendshëm.”
“Në kërkesë të Sekretares për Sigurinë e Brendshme, Kristi Noem, po i urdhëroj Sekretarit të Luftës, Pete Hegseth, që të sigurojë të gjitha Trupat e nevojshme për të mbrojtur Portlandin, të shkatërruar nga lufta, dhe cilëndo nga objektet tona të ICE që janë nën rrethim nga sulme të Antifa-s dhe terroristëve të tjerë të brendshëm. Gjithashtu autorizoj Fuqinë e Plotë, nëse është e nevojshme,” shkroi Trump.
Shtëpia e Bardhë nuk dha koment shtesë kur u kontaktua nga CNN për sqarime mbi atë që presidenti nënkuptoi me “fuqi të plotë” dhe cilat trupa do të dërgoheshin në qytet.
Ky zhvillim vjen pas një të shtënë në një objekt të ICE në Dallas, Texas, nga një person me armë që hetuesit besojnë se synonte stafin dhe pronën e ICE. Ai vrau një të paraburgosur dhe plagosi rëndë dy të tjerë.
Në fillim të shtatorit, Trump i tha gazetarëve në Zyrën Ovale se Portland nuk ishte domosdoshmërisht në radar si një qytet ku ishte e nevojshme ndërhyrja federale, por pretendoi, pa prova, se “terroristë të paguar” po shkaktonin shkatërrim në qytet, të cilin ai tha se administrata e tij do ta “fshinte”.
“Këta janë nxitës të paguar, dhe janë shumë të rrezikshëm për vendin tonë. Dhe kur shkojmë atje, nëse shkojmë në Portland, ne do t’i fshijmë”, tha Trump në Zyrën Ovale më herët këtë muaj. “Do të zhduken, dhe do të zhduken. Ata nuk do të qëndrojnë as për të luftuar. Nuk do të qëndrojnë aty.”
