Artikull i La Repubblica, nga Paolo Mastrolilli
Presidenti amerikan Donald Trump beson se plani i tij mund të sjellë stabilitet në Lindjen e Mesme, edhe pse me disa rezerva, sepse ekziston gjithmonë rreziku që Hamas të ketë pranuar propozimin e tij vetëm për të shmangur pasojat më të rënda të ultimatumit.
Megjithatë, presidenti i SHBA-ve mendon se kjo është një mundësi për të zgjatur dhe zgjeruar marrëveshjet e Abrahamit, të cilat i kishte negociuar edhe gjatë mandatit të tij të parë, dhe për të korrigjuar një gabim të kryeministrit izraelit Netanyahu, i cili më 9 shtator bombardoi Doha-n.
Kjo kuptohet nga deklarata që Trump publikoi në rrjetin e tij social, Truth, menjëherë pas përgjigjes së Hamas.
Mesazhi i Trump
“Bazuar në deklaratën e sapolëshuar nga Hamas, besoj se janë gati për një paqe të qëndrueshme. Izraeli duhet të ndërpresë menjëherë bombardimet mbi Gaza, në mënyrë që të lirohen pengjet në mënyrë të sigurt dhe të shpejtë!”, shkroi Trump, duke shtuar:
Jemi duke diskutuar tashmë mbi detajet që duhen përcaktuar. Nuk bëhet fjalë vetëm për Gazën, por për një paqe të gjatë dhe të dëshiruar në Lindjen e Mesme.
Gabimi i nisur nga Doha
Për habinë e të gjithëve, gjithçka filloi me bombardimin e Doha-s.
Siç shkruajnë mediat e huaja, Trump ishte informuar në minutën e fundit nga Netanyahu dhe u zemërua shumë, sepse sulmi prishi ndërmjetësimin e ndërlikuar të dërguarit të tij, Witkoff. Ai kishte telefonuar menjëherë emiratin al Thani, por ishte vonë, pasi predhat ishin lëshuar.
Megjithatë, Netanyahu gaboi në objektiv, duke vrarë një roje të Katarit, në vend të liderëve të Hamas, të cilët ishin mbledhur për të diskutuar planin e paqes të Washingtonit.
Po shfrytëzon “miqtë arabë”?
Trump shfrytëzoi reagimin e liderëve arabë miq, përfshirë Katarin, Arabinë Saudite dhe Egjiptin, për të shtyrë Netanyahu-n që të pranonte planin e tij 21-pikësh.
Pas negociatave intensive gjatë Asamblesë së Përgjithshme të OKB-së, u arrit një kompromis: një telefonatë kërkimi faljeje nga Netanyahu për Katarin dhe miratimi me rezervë nga Hamas, pikërisht para ultimatumit të Trump, që kishte kërcënuar të shkatërronte grupin terrorist nëse nuk pranonte.
Sigurisht, mbeten ende shumë detaje për t’u sqaruar, por Trump beson se ky është të paktën hapi i parë drejt një paqeje të mundshme dhe të qëndrueshme në të gjithë Lindjen e Mesme.
