Menjëherë sapo dorëzuan kërkesën për ngritjen e Komisionit të Reformës Zgjedhore, socialistët kanë bërë edhe propozimet e para konkrete.
Gjatë raportimit vjetor të Komisionerit Shtetëror të Zgjedhjeve në Komisionin e Ligjeve, Ulsi Manja dhe Damian Gjiknuri folën për rëndësinë që ka ndryshimi i modelit të numërimit të votave, depolitizimi i administratës dhe financimi i partive.
Shqetësimi i opozitës për raportin e KQZ-së ishte mosndërhyrja për të frenuar me sanksion përdorimin e administratës dhe aseteve shtetërore nga qeveria gjatë zgjedhjeve.
Raporti final i OSBE/ODIHR për zgjedhjet e 11 majit pritet të dalë brenda pak ditësh, por vetë komisioneri Celibashi vlerëson punën e bërë nga institucioni i tij për mbarëvajtjen e këtij procesi.
