Drejtoria e Përgjithshme e Policisë së Shtetit, ka bërë riorganizimin e disa prej strukturave të vendit, kryesisht në Drejtoritë Vendore të Tiranës, Shkodrës, Elbasanit dhe Dibrës.
Kështu, Kryekomisari Elton Halili, me detyrë Shef Komisariati në Komisariatin e Policisë Librazhd, është transferuar në Drejtorinë Vendore të Dibrës, ku do të jetë Shef Komisariati në Bulqizë.
Vendin e tij në Librazhd e ka zënë Nertila Meta. Kjo nuk është hera e parë që në Librazhd emërohet një grua në krye të komisariatit. Pak muaj më parë në krye të Komisariatit të Kuçovës u emërua Ediona Dano.
Kryekomisari Edvin Peci, me detyrë Shef Komisariati Bulqizë, është transferuar në Drejtorinë Vendore të Tiranës, në krye të Komisariatit nr. 6 në kryeqytet.
Kryekomisari Erdit Rrëçeku, me detyrë Shef Komisariati është transferuar nga Komisariati i Policisë nr.6 të Tiranës, në Elbasan, ku do të jetë Shef Sektori për Krimet në Volum.
Komisari Klaudio Zhupa, me detyrë Shef Seksioni për Krimet në Volum, në Komisariatin e Policisë Kavajë, do të transferohet në Drejtorinë Vendore të Shkodrës, ku do të emërohet si Shef Komisariati në Komisariatin e Policisë Malësi e Madhe.
Ndërkohë, Kryekomisari Mariglen Duçi, me detyrë Shef Komisariati në Komisariatin e Policisë Malësisë së Madhe, në DVP Shkodër, emërohet Shef Komisariati në Komisariatin e Policisë Dibër.
Së fundmi, Kryekomisari Altin Lila, me detyrë Shef Komisariati në Komisariatin e Policisë Dibër, emërohet Specialist për Hetimin e Krimeve ndaj Personit në Drejtorinë për Hetimin e Krimeve të Rënda në DPPSH.
Këto lëvizje, kanë si qëllim forcimin e punës policore në territor dhe rritjen e eficiencës në menaxhimin e strukturave vendore.
Kreshnik Bajraktari në krye të DPSHTRR
Ministrja e Infrastrukturës dhe Energjisë, Belinda Balluku, prezantoi sot drejtuesin e ri të Drejtorisë së Përgjithshme të Shërbimeve të Transportit Rrugor (DPSHTRR), Kreshnik Bajraktarin, duke vlerësuar punën e deritanishme të institucionit dhe transformimin që ka pësuar ndër vite. Ajo shtoi se inovacioni u bë baza e çdo shërbimi publik në DPSHTRR, duke e kthyer institucionin në një shembull të suksesit për mënyrën si duhet të ofrohen shërbimet ndaj qytetarëve.
Ministrja kujtoi situatën e vështirë të viteve të para të reformës, veçanërisht në arkiva dhe zyrat rajonale.
“Në vitin 2020 vizitova arkivën e Fierit, ku tavani i katit të parë ishte i harkuar nga pesha e dokumenteve, dhe në Laç uji arrinte deri në një metër. Vendosëm të nisnim një proces të gjatë për të ndërtuar asetet e duhura logjistike dhe për të ruajtur dokumentacionin siç duhet,” theksoi ajo.
Balluku nënvizoi se falë reformës, DPSHTRR ka dyfishuar mbulimin territorial, me 17 zyra të reja shërbimi dhe dy poligone model në Vlorë dhe Fushë-Prezë.
Në krahasim me vitin 2018, janë ofruar 424 mijë shërbime më shumë, ndërsa numri total i shërbimeve është nëntëfishuar.
Reformat kanë sjellë edhe përfitime të drejtpërdrejta për qytetarët, 21 milionë kilometra të kursyera në udhëtime, 1.4 milionë litra karburant më pak të konsumuar, dhe 260 milionë lekë më pak shpenzime.
Një tjetër shtyllë e rëndësishme e reformës, sipas Ballukut, është siguria rrugore dhe riritestimi i drejtuesve që humbasin pikët e patentës.
“Kemi nisur një proces rigoroz për rikualifikimin e drejtuesve të mjeteve që humbasin pikët. Deri tani janë kryer 2,359 riregjistrime, dhe vetëm 13.4% kanë kaluar testin, duke garantuar që në rrugë të kthehen vetëm drejtues të disiplinuar,” tha ministrja.
Ajo shtoi se kontrolli teknik i automjeteve mbetet një tjetër komponent kyç i mirëmenaxhimit dhe sigurisë në qarkullim.
Balluku përfundoi duke theksuar se reforma në DPSHTRR është një nga më të thellat në sektorin e shërbimeve publike, dhe se qeveria do të vijojë të mbështesë këtë model suksesi në institucione të tjera të vendit.
