Ka vazhduar për ditën e tretë radhazi protesta e transportuesve të trafikut urban.
Në rrugët e kryeqytetit sërish janë parkuar autobusët e transportuesve të “Trafikut Urban”, por edhe të linjave private që qarkullojnë në Prishtinë, duke shkaktuar kolona të mëdha.
Përfaqësuesi i punëtorëve të “Trafikut Urban”, Ilmi Gashi, ka thënë se shpresa e tyre është te mbledhja e jashtëzakonshme e Kuvendit Komunal të Prishtinës, e cila është thirrur për të enjten.
Ai, nga objekti i Komunës së Prishtinës, ku janë mbledhur transportuesit, ka thënë se përmes protestës kërkojnë pagën e tyre, e cila është një të drejtë elementare.
Që nga e hëna, kryeqyteti nuk ka qarkullim të autobusëve, dhe kjo sipas tyre ndodhi për shkak të mungesës së pagës dhe të karburanteve.
Problemet me pagesat e shërbimeve në Komunën e Prishtinës kanë ardhur si pasojë e mosmiratimit të buxhetit të komunës për vitin 2025 nga Kuvendi i Kosovës, por kryetari i Prishtinës, Përparim Rama, ka hedhur akuza ndaj Ministrisë së Financave, duke thënë se po bllokon jashtëligjshëm edhe të hyrat vetanake të komunës.
