Qytetarët e Vlorës kanë protestuar këtë të hënë para bashkisë për shkak të mungesës së ujit të pijshëm, problem që ka prekur të gjithë qytetin prej disa ditësh. Të revoltuar nga situata dhe mungesa e informacionit zyrtar, protestuesit kanë hedhur vezë drejt godinës së bashkisë, duke kërkuar përgjigje konkrete se kur do të zgjidhet defekti në linjën kryesore të furnizimit me ujë.
Defekti ka shkaktuar ndërprerje totale të furnizimit me ujë që prej ditës së enjte, ndërsa banorët thonë se nuk kanë pasur asnjë mundësi alternative për t’u furnizuar. Ata kërkojnë vendosjen e një afati të qartë se kur uji do të rikthehet në banesat e tyre, si dhe transparencë mbi masat konkrete që janë marrë nga bashkia dhe ndërmarrja e ujësjellësit.
Edhe pse autoritetet kanë deklaruar se po punohet për riparimin e defektit, deri më tani problemi nuk është zgjidhur. Ndërmarrja e Ujësjellës-Kanalizimeve Vlorë nuk ka dhënë një afat përfundimtar për rregullimin e situatës. Më herët ishte njoftuar se defekti do të zgjidhej brenda tre ditësh, por përpjekjet deri tani nuk kanë qenë të suksesshme.
Si zgjidhje provizore, Bashkia e Vlorës ka njoftuar se do të shpërndajë ujë me autobotë sipas orareve dhe prioriteteve të caktuara. Fillimisht do të furnizohen institucionet me rëndësi të veçantë, si spitalet dhe institucionet e emergjencës, ndërsa më pas familjet, sipas zonave dhe rasteve më urgjente. Autoritetet pranojnë se është e pamundur të furnizohet i gjithë qyteti në këtë mënyrë, por kanë vënë në dispozicion numra kontakti për qytetarët që kanë nevojë urgjente për ujë.
Një natë më parë banorët protestuan për mungesën e ujit të pijshëm duke bllokuar Bulevardin “Ismail Qemali”. Ata gjithashtu hyrë brenda ambienteve të teatrit, ku po mbahej mbrëmja Gala e fundvitit, e cila për shkak të situatë, u anulua.
Qytetarët e Vlorës kanë mësyrë dyert e bashkisë për të kërkuar zgjidhje urgjente të furnizimit me ujë të pijshëm. Prej ditësh pa ujë, ata kanë protestuar sërish sot duke kërkuar marrjen e masave nga institucionet për rikthimin e ujit të pijshëm. Me bidonë në duar ata i kanë rënë dyerve të bashkisë në shenjë proteste për mungesën e ujit të pijshëm prej ditësh.
“Do na zërë kolera. Institucionet të mblidhen të gjitha të marrin masa. Prefekti të mbledhë shtabin e emergjencave të gjendet zgjidhje”, thanë banorët, teksa nuk i kanë kursyer akuzat dhe sulmet ndaj institucioneve.
Gjatë protestës gjithashtu nuk kanë munguar dhe tensionet, ku qytetarët kanë qëlluar me vezë drejt bashkisë, ndërsa kanë tentuar dhe të shtyjnë efektivët e policisë që janë vendosur rreth godinës së bashkisë.
Edhe pse autoritetet kanë deklaruar se po punohet për riparimin e defektit, deri më tani problemi nuk është zgjidhur. Ndërmarrja e Ujësjellës-Kanalizimeve Vlorë nuk ka dhënë një afat përfundimtar për rregullimin e situatës.
Protestuesit janë zhvendosur në kryqëzimin pranë sheshit të Flamurit për të vijuar protestën që kanë deklaruar se do të vijojë deri në zgjidhjen e problemit.
