Pas gati 12 orësh debat, maxhoranca socialiste ka miratuar me 85 vota pro aktin normativ për ndryshimin e buxhetit të shtetit si dhe ndryshimet në dy ligje të Reformës në Drejtësi, të cilat kërkonin shumicë të cilësuar votash.
Megjithë mungesën e kryeministrit Rama, socialistët përfituan edhe nga votat e Partisë Social Demokrate për të kaluar kufirin e 84 votave të nevojshme.
Me 85 vota gjithashtu u miratuan edhe ndryshimet në Kodin Penal, por në këtë pikë deputeti socialist Erion Braçe u përball sërish me kreun e grupit të tij Taulant Balla, me të cilin kishte debatuar më herët gjatë debatit për aktin normativ të buxhetit.
Braçe propozoi një ndryshim në Kodin Penal për të dënuar me gjobë ose burg ata që u shesin produkte të duhanit fëmijëve nën 18 vjeç.
“Amendamenti synon kriminalizimin e shitjes të produkteve të duhanit, cigareve elektronike personave nën moshën 18 vjeç, kur më parë janë marrë masë administrative dhe dënohet me gjobë deri në 300 mijë lekë ose burgim deri në 6 muaj”, shpreh Braçe.
Pas tij e mori fjalën kreu i grupit, Taulant Balla, i cili tha se drafti që kishte shkuar në Kuvend ishte dakordësuar me Komisionin Europian dhe për amendamentin e Braçes nuk kishin marrë një miratim paraprak nga zyra e Delegacionit të BE-së.
Ai i sugjeroi Braçes që të tërhiqte nismën dhe ta rikthente në një moment të dytë për votim, gjë që ish-zv.kryeministri nuk e pranoi.
“Në emër të grupit të PS, nuk ka asnjë dyshim që mbështesim çdo lloj nisme të kësaj natyre. Por sikurse u tha gjatë diskutimit të paketës, kemi para një paketë e negociuar gërmë për gërmë me Komisionin Europian. Nuk është serioze për ne që të kalonim sot për nesër këto ndryshime, kemi pasur një përpjekje gjatë këtyre orëve me Komisionin, ia kemi dërguar materialin por nuk kemi marrë konfirmim. i kërkoj Braçes ta tërheqë nismën dhe në një moment të dytë ta votojmë. Nëse ai nuk e tërheq, i kërkoj kolegëve të abstenojnë për këtë nismë”, tha Balla, ndërkohë që pas tij 82 deputetë socialistë abstenuan për amendamentin e Braçes.
Ky i fundit në dy raste, ligjin e importit të armëve dhe atë të lobimit nuk mori pjesë në votim. Në ligjin e ri të lobimit, nuk ishte i vetëm pasi “abstenimin” e tij e shprehu me votë edhe Fatmir Xhafaj, i cili gjithashtu nuk mori pjesë në votim.
Votimet në seancë
Akti normativ nr. 11, datë 19.12.2025 “Për disa ndryshime dhe shtesa në ligjin nr. 115/2024, “Për buxhetin e vitit 2025”, të ndryshuar.
85 pro; 0 abstenim; 10 kundër
Projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Italisë, për bashkëpunimin strategjik në kujdesin shëndetësor, energjinë, mjedisin, industrinë e sigurisë dhe mbrojtjes, menaxhimin e migracionit, arsimin, inovacionin, diasporën, transformimin ekonomik dhe rritjen inteligjente”.
85 pro; 0 abstenim; 0 kundër
Projektligji “Për aderimin e Republikës së Shqipërisë në Traktatin për Pronësinë Intelektuale, Burimet Gjenetike dhe Njohuritë Tradicionale të Lidhura me To, bërë në Gjenevë, më 24 maj 2024”.
85 pro; 0 abstenim; 0 kundër
Projektligji “Për ratifikimin e vendimit nr. 5/2024 të Komitetit të Përbashkët të Marrëveshjes së Tregtisë së Lirë të Evropës Qendrore “Për aspektet tregtare të të drejtave të pronësisë intelektuale””.
84 pro; 0 abstenim; 0 kundër
Projektligji “Për ratifikimin e vendimit nr. 6/2024 të Komitetit të Përbashkët të Marrëveshjes së Tregtisë së Lirë të Evropës Qendrore “Për lehtësimin e tregtisë së shërbimeve të ofruara nga agjencitë e udhëtimit dhe operatorët turistikë””.
85 pro; 0 abstenim; 0 kundër
Projektligji “Për aderimin e Republikës së Shqipërisë në protokollin për ndalimin e tregtisë së paligjshme në produktet e duhanit”.
85 pro; 0 abstenim; 0 kundër
Projektligji “Për disa shtesa dhe ndryshime në ligjin nr. 7895, datë 27.1.1995, “Kodi Penal i Republikës së Shqipërisë”, të ndryshuar.
Votimi në parim: 85 pro; 0 abstenim; 10 kundër
Amendamenti i Braçes: 2 pro, 82 abstenim, 0 kundër
Votimi në tërësi: 85 pro, 0 abstenim, 9 kundër
Projektligji “Për disa shtesa dhe ndryshime në ligjin nr. 7895, datë 27.01.1995 “Kodi Penal i Republikës së Shqipërisë”, i ndryshuar. Nisma e Jorida Tabakut
10 pro, 1 abstenim (Iris Luarasi), 82 kundër
Projektligji “Për disa ndryshime në ligjin nr. 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar.
85 pro; 0 abstenim; 10 kundër
Projektligji “Për disa ndryshime në ligjin nr. 115/2016 “Për organet e qeverisjes së sistemit të drejtësisë”, të ndryshuar.
85 pro; 0 abstenim; 10 kundër
Projektligji “Për parandalimin dhe mbrojtjen nga dhuna ndaj grave dhe dhuna në familje”.
85 pro; 1 abstenim (Erald Kapri); 0 kundër
Projektligji “Për lobimin në Republikën e Shqipërisë”.
83 pro (Xhafaj e Braçe nuk votojnë); 0 abstenim; 10 kundër
Projektligji “Për importin, eksportin dhe transitin e armëve të zjarrit, të komponentëve të tyre kryesorë dhe të municioneve”.
84 pro (Braçe nuk voton); 0 abstenim; 10 kundër
Projektligji “Për disa shtesa dhe ndryshime në ligjin nr. 8891, datë 02.05.2002 “Për organizimin dhe funksionimin e Komisioneve Hetimore të Kuvendit”.
85 pro; 0 abstenim; 10 kundër
Projektligji “Për disa shtesa dhe ndryshime në ligjin nr. 97/2013 “Për Mediat Audiovizive në Republikën e Shqipërisë”, i ndryshuar.
85 pro; 0 abstenim; 1 kundër
Prezenca e OSBE-së në Shqipëri ka mirëpritur ndryshimet e fundit në Kodin Penal lidhur me shpifjen, duke i cilësuar si një hap të parë të rëndësishëm drejt forcimit të lirisë së shprehjes.
Në reagimin e saj, OSBE-ja thekson se do të vijojë të inkurajojë dekriminalizimin e plotë të shpifjes dhe përdorimin e masave civile proporcionale, në përputhje me standardet ndërkombëtare për lirinë e medias.
“Prezenca e OSBE-së në Shqipëri mirëpret ndryshimet e fundit në Kodin Penal lidhur me shpifjen, si një hap të parë të rëndësishëm drejt forcimit të lirisë së shprehjes. Forcimi i mbrojtjes për gazetarët pasqyron një rekomandim të hershëm të OSBE-së.
Ne vijojmë të inkurajojmë dekriminalizimin e plotë të shpifjes dhe përdorimin e masave civile proporcionale”, shkruhet në reagim.
Ndryshimet në Kodin Penal u miratuan nga Kuvendi i Shqipërisë me 85 vota pro.
