E ardhmja politike e lideres së ekstremit të djathtë francez, Marine Le Pen, varet në një fije të hollë peri. Gjatë seancës së apelit të zhvilluar këtë të martë në Paris, prokurorët francezë kanë kërkuar një dënim të ashpër që, nëse konfirmohet nga gjykatësit, do ta përjashtonte atë përfundimisht nga gara presidenciale e vitit 2027.
Kërkesa e organit të akuzës është e qartë: 5 vjet ndalim për të mbajtur poste publike, 1 vit arrest shtëpie me byzylyk elektronik dhe një gjobë prej 100,000 eurosh.
Le Pen, tashmë 57 vjeçe, po përballet në Gjykatën e Apelit për të rrëzuar një vendim të marsit 2025, i cili e shpalli fajtore për keqpërdorim të fondeve të Parlamentit Evropian. Ajo akuzohet se gjatë periudhës 2004–2016 ka përdorur fondet e BE-së, të destinuara për asistentët parlamentarë, për të paguar stafin e partisë së saj në Francë.
Prokurori Stéphane Madoz-Blanchet e cilësoi këtë si një “sistem” të mirëorganizuar për të përvetësuar paratë publike. “Aktet e përvetësimit u fshehën qëllimisht. Paratë publike u mblodhën pikë pas pike derisa formuan një lumë,” argumentoi prokurori në sallë.
Gjatë gjyqit, Le Pen ka pranuar se janë bërë “gabime” administrative, por ka mohuar ekzistencën e një sistemi kriminal për të vjedhur fondet. “Nuk pres kurrë surpriza të këndshme kur shkel në një sallë gjyqi. Nuk i kam unë letrat në dorë,” u shpreh ajo për gazetarët, duke lënë të kuptohet pesimizmin e saj për vendimin.
Nëse gjykata e apelit vendos ta shpallë fajtore dhe të miratojë ndalimin e funksioneve publike, Le Pen do të zëvendësohet në garën presidenciale nga “nxënësi” i saj politik, 30-vjeçari Jordan Bardella. Vendimi pritet të jepet para verës së këtij viti.
