Menjëherë pas zhvillimit të bisedimeve me Iranin, Steve Witkoff dhe Jared Kushner vizituan aeroplanmbajtësen amerikane USS Abraham Lincoln, sipas një zyrtari të lartë amerikan dhe dy burimeve të cituara nga CNN.
Sipas të njëjtit zyrtar, vizita u realizua me ftesë të komandantit të Komandës Qendrore të SHBA-së (CENTCOM), admiralit Brad Cooper, me qëllim shprehjen e vlerësimit të administratës amerikane për personelin e forcave të armatosura që shërben në rajon. Aeroplanmbajtësja është pjesë e grupit goditës Lincoln Carrier Strike Group.
Mesazh force në Mesdheun e gjerë
CNN thekson se prania e Kushner dhe Witkoff në aeroplanmbajtëse dërgon një mesazh të qartë se, pavarësisht rifillimit të negociatave mes Shteteve të Bashkuara dhe Iranit, administrata Trump vijon të mbajë një prani të fortë ushtarake në Lindjen e Mesme.
Përqendrimi i forcave amerikane në rajon është rritur ndjeshëm javët e fundit, në një periudhë kur presidenti Donald Trump po shqyrtonte edhe skenarë të mundshëm për veprime ushtarake kundër Iranit, pa marrë megjithatë një vendim përfundimtar.
Vizita në USS Abraham Lincoln u zhvillua një ditë pasi Trump deklaroi se SHBA-të kishin pasur “bisedime shumë të mira” me Iranin, pas zhvillimit të konsultimeve indirekte mes delegacioneve të dy vendeve në Oman.
“Irani duket se dëshiron shumë të arrijë një marrëveshje”, u shpreh Trump para gazetarëve në bordin e avionit presidencial Air Force One, duke shtuar se “mbetet për t’u parë se cili do të jetë përmbajtja e kësaj marrëveshjeje”.
Këto bisedime përbëjnë raundin e parë të kontakteve mes Uashingtonit dhe Teheranit pas sulmeve të SHBA-së dhe Izraelit ndaj Iranit verën e kaluar.
Sipas një burimi rajonal, si autoritetet e Omanit ashtu edhe pala iraniane ishin informuar paraprakisht për vizitën në aeroplanmbajtësen amerikane.
