Prindërit amerikanë që kanë detyrime të prapambetura financiare për fëmijët e tyre së shpejti mund të përballen me një masë drastike: revokimin e menjëhershëm të pasaportës. Administrata Trump po përgatitet të zgjerojë dhe të ashpërsojë zbatimin e një ligji 30-vjeçar, duke kaluar nga një qasje pasive në një veprim proaktiv për mbledhjen e borxheve.
Deri më tani, legjislacioni federal i vitit 1996 lejonte revokimin e pasaportave për borxhe mbi 2,500 dollarë për mbështetjen e fëmijëve. Megjithatë, Departamenti i Shtetit vepronte vetëm në momentin kur personi aplikonte për rinovimin e pasaportës apo kërkonte shërbime të tjera konsullore.
Sipas planit të ri, të konfirmuar nga tre zyrtarë amerikanë në kushte anonimati, Departamenti i Shtetit nuk do të presë më aplikimet. Ai do të fillojë të revokojë pasaportat me iniciativën e vet, duke përdorur të dhënat e siguruara nga Departamenti i Shëndetësisë dhe Shërbimeve Njerëzore (HHS).
Kush preket i pari?
Duke pasur parasysh numrin e madh të qytetarëve që kanë detyrime të prapambetura, zbatimi i masës do të bëhet në mënyrë të shkallëzuar.
Faza e pare do të shënjestrojë mbajtësit e pasaportave që kanë borxhe mbi 100,000 dollarë. Zyrtarët vlerësojnë se në këtë kategori hyjnë më pak se 500 persona.
Këta individë mund ta shmangin revokimin nëse bien dakord për një plan shlyerjeje me HHS pasi të jenë njoftuar për masën.
Zyrtarët paralajmëruan se sapo pragu i borxhit të ulet në faza të mëvonshme, numri i personave që do të humbasin të drejtën e udhëtimit jashtë vendit do të rritet ndjeshëm, duke prekur potencialisht mijëra qytetarë.
Qëndrimi i Departamentit të Shtetit
Në një reagim për Associated Press, Departamenti i Shtetit konfirmoi se po shqyrton opsionet për të zbatuar ligjin me rigorozitet.
“Është e thjeshtë: prindërit e pakujdesshëm duhet të paguajnë detyrimet e tyre të prapambetura për mbështetjen e fëmijëve. Ne po punojmë për të parandaluar që ata që detyrohen shuma të konsiderueshme të neglizhojnë detyrimet e tyre ligjore dhe morale,” thuhej në deklaratë.
Që nga miratimi i Aktit të Përgjegjësisë Personale në vitin 1996, ky program ka arritur të mbledhë rreth 621 milionë dollarë në pagesa të prapambetura, duke përfshirë nëntë raste ku shumat e mbledhura kalonin 300,000 dollarë.
