Një njësi e sapokrijuar e Pentagonit, e specializuar në mbledhjen e informacioneve për kartelet e drogës, ka kontribuar në operacionin gjatë të cilit ushtria meksikane vrau baronin e njohur të drogës, “El Mencho”. Lajmi u bë i ditur nga një zyrtar ushtarak amerikan për agjencinë e lajmeve Reuters.
Bëhet fjalë për Njësinë e Përbashkët Ndërinstitucionale Kundër Karteleve, ku marrin pjesë disa agjenci qeveritare amerikane.
Njësia u krijua zyrtarisht muajin e kaluar me synim hartëzimin e rrjeteve të karteleve që veprojnë përgjatë kufirit SHBA–Meksikë.
Sipas zyrtarit amerikan, i cili foli në kushte anonimiteti, operacioni u krye nga forcat e armatosura meksikane, ndërsa pala amerikane ofroi mbështetje me informacion.
Një tjetër ish-zyrtar amerikan deklaroi se SHBA-të kishin përgatitur një dosje të detajuar për “El Mencho” dhe ia kishin dorëzuar autoriteteve meksikane, duke theksuar se ai ndodhej në krye të listës së objektivave amerikane në Meksikë.
Operacioni u zhvillua në shtetin perëndimor të Jalisco-s, me qëllim kapjen e tij, por përfundoi me vrasjen e kreut të kartelit. Pas lajmit për vdekjen e tij, shpërtheu një valë dhune në disa shtete meksikane, ku anëtarë të kartelit dogjën automjete dhe ngritën barrikada në autostrada kryesore.
Nemesio Oseguera Cervantes, i njohur si “El Mencho”, 60 vjeç dhe ish-polic, ishte udhëheqësi i fuqishëm i kartelit “Jalisco Nueva Generación”. Ai kishte arritur t’i shmangej arrestimit për vite me radhë, pavarësisht se SHBA-të kishin vendosur një shpërblim prej 15 milionë dollarësh për kapjen e tij.
Eliminimi i “El Menchos” konsiderohet një fitore e rëndësishme për Meksikën në luftën kundër karteleve të drogës, të cilat akuzohen për trafikimin e kokainës dhe fentanilit drejt Shteteve të Bashkuara.
Kush ishte ish-oficeri, “El Mencho”
Ministria e Mbrojtjes e vendit tha se Oseguera u plagos rëndë në një shkëmbim zjarri në shtetin Jalisco dhe vdiq gjatë transportit ajror për në Mexico City. Ministria vuri në dukje se autoritetet amerikane po u jepnin “informacion shtesë” homologëve të tyre meksikanë.
Operacioni i ushtrisë shkaktoi një valë dhune, me makina të djegura dhe persona të armatosur që bllokuan autostradat në të paktën gjashtë shtete.
Ish-oficeri i policisë 60-vjeçar ishte udhëheqësi i Kartelit të fuqishëm Jalisco New Generation (CJNG), i cili mori emrin nga shteti perëndimor meksikan ku ndodhet një nga qytetet më të mëdha të vendit, Guadalajara. Brenda një periudhe relativisht të shkurtër kohore, CJNG u transformua në një ndërmarrje kriminale ndërkombëtare që rivalizoi ish-aleatët e saj, Kartelin Sinaloa, bandën e Joaquín “El Chapo” Guzmán, i cili aktualisht ndodhet në burgjet amerikane.
Operacioni kundër Oseguera-s pasoi presionin e ushtruar nga administrata Trump mbi atë të presidentes meksikane Claudia Sheinbaum për të intensifikuar goditjen ndaj trafikantëve të drogës, duke kërcënuar se përndryshe SHBA-të do të ndërhynin drejtpërdrejt në Meksikë.
Zëvendëssekretari i Shtetit i SHBA-së, Christopher Landau, e quajti vdekjen e Oseguera-s një “zhvillim të rëndësishëm” për SHBA-në, Meksikën dhe të gjithë Amerikën Latine.
Vdekja e tij shënon gjithashtu një fitore të madhe në luftën e Meksikës kundër karteleve përgjegjëse për trafikimin e kokainës dhe fentanilit me vlerë miliarda dollarë në Shtetet e Bashkuara. Por pritet gjithashtu që kjo të shkaktojë një valë dhune në të gjithë Meksikën.
“Do të ketë një sasi të jashtëzakonshme dhune”, tha Wanda Felbab-Brown, një eksperte për krimin e organizuar ndërkombëtar. Ajo e krahasoi Osegueran me baronë të tjerë të drogës që janë kapur ose vrarë vitet e fundit, si Guzman dhe Ismael “El Mayo” Zambada, të dy nga karteli Sinaloa.
Guvernatori i shtetit Jalisco, Pablo Lemus Navarro, u bëri thirrje banorëve të qëndrojnë në shtëpi derisa situata të vihet nën kontroll. Ambasada amerikane gjithashtu u bëri thirrje qytetarëve amerikanë në Meksikë të kërkojnë strehim të sigurt.
