Shtëpia e superyllit të muzikës pop, Rihanna, në Beverly Hills është sulmuar me armë zjarri.
Sipas policisë në Los Anxhelos ngjarja ndodhi rreth orës 13:15, sipas kohës lokale, të dielën më 8 mars. Oficerët mbërritën në vendngjarje dhe arrestuan një të dyshuar, ndërsa një armë u sekuestrua nga autoritetet.
Nga të shtënat nuk u raportua për persona të lënduar, megjithatë një nga plumbat thuhet se ka depërtuar në murin e shtëpisë së artistes. Autoritetet kanë bërë të ditur se rasti po hetohet nga Divizioni i Grabitjeve dhe Vrasjeve.
Sipas raportimeve të Los Angeles Times, e dyshuara është një grua 30-vjeçare, identiteti i së cilës nuk është bërë ende publik.
Burime për revistën People Magazine kanë konfirmuar se Rihanna jeton në këtë rezidencë së bashku me partnerin e saj, dhe tre fëmijët e tyre, RZA, Riot dhe Rocki. Sipas të njëjtave burime, këngëtarja ndodhej në shtëpi në momentin e incidentit, por është mirë dhe nuk ka pësuar lëndime.
