Irani ka kërcënuar se do të vendosë mina detare për të bllokuar të gjithë Gjirin nëse sulmohen brigjet ose ishujt e tij, sipas agjencisë së lajmeve Fars.
Në një deklaratë, Këshilli Mbrojtjës i Iranit tha se i gjithë Gjiri Persik do të përballej me një situatë të ngjashme si ngushtica e Hormuzit.
“Çdo përpjekje nga armiku për të sulmuar brigjet ose ishujt iranianë, natyrshëm dhe në përputhje me praktikën e zakonshme ushtarake, do të shkaktojë minimin e të gjitha rrugëve të aksesit dhe linjave të komunikimit në Gjirin Persik dhe në brigje me lloje të ndryshme minash detare, duke përfshirë minat lundruese që mund të lëshohen nga brigjet.
Në atë rast, i gjithë Gjiri Persik praktikisht do të gjejë një situatë të ngjashme me ngushticën e Hormuzit për një kohë të gjatë. Këtë herë, së bashku me ngushticën e Hormuzit, i gjithë Gjiri Persik praktikisht do të bllokohet dhe përgjegjësia për këtë do të bjerë mbi palën kërcënuese.”, thuhet në deklaratë.
Irani u ka lejuar disa vendeve mike, përfshirë Kinën, Indinë dhe Pakistanin, të sigurojnë kalimin e sigurt të anijeve të tyre nëpër ngushticë, por në fakt e ka mbyllur atë për të tjerët duke sulmuar anije dhe duke vendosur mina në kanalin ujor, duke shkaktuar një krizë të madhe në tregjet globale të energjisë.
SHBA-të thuhet se po shqyrtojnë plane për të pushtuar ose bllokuar ishullin Kharg, strategjikisht të rëndësishëm të Iranit, për të ushtruar presion mbi Teheranin që të rihapë rrugën ujore jetësore, në atë që do të shënonte një përshkallëzim të madh në luftën SHBA-Izrael.
Presidenti amerikan Donald Trump paralajmëroi të shtunën vonë se SHBA-të do të “shkatërrojnë” termocentralet iraniane nëse ngushtica nuk hapet para një afati 48-orësh.
