Eurovision Song Contest, kompeticioni më i gjatë ndërkombëtar i muzikës, po zgjerohet për herë të parë në Azi. Dhjetë vende të rajonit, përfshirë Koreja e Jugut, Tajlanda, Filipinet dhe Vietnami, kanë konfirmuar pjesëmarrjen, ndërsa finalja e madhe do të zhvillohet më 14 nëntor në Bangkok.
Organizatorët e shohin këtë zgjerim si veçanërisht të rëndësishëm, duke qenë se viti 2026 shënon 70-vjetorin e Eurovision-it. “Është një kapitull i ri i rëndësishëm në një rajon të pasur me kulturë, kreativitet dhe talent,” deklaroi Martin Green, drejtor i konkursit pranë European Broadcasting Union.
Formati i garës do të ndjekë modelin tradicional: çdo vend do të organizojë përzgjedhjet kombëtare, ndërsa fituesit do të përballen në finalen aziatike. Rregullat e plota ende nuk janë publikuar, por organizatorët premtojnë se “çdo votë do të ketë rëndësi” dhe se eventi do të jetë një “festë e muzikës pop origjinale”.
Kjo nuk është tentativa e parë për ta zgjeruar Eurovision-in jashtë Evropës. Në vitin 2022 u organizua American Song Contest, por ai nuk arriti suksesin e pritur. Ndryshe nga SHBA, organizatorët besojnë se Azia—me tregun e saj dinamik muzikor, fenomenin e K-pop dhe kulturën e karaoke-s—ofron terrenin ideal për një edicion të ri.
Deri më tani, vendet pjesëmarrëse janë Bangladeshi, Butani, Kamboxhia, Laosi, Malajzia, Nepali, Filipinet, Koreja e Jugut, Tajlanda dhe Vietnami.
